वाहन उद्योगाने जागतिक मंदीच्या सावटातून बाहेर आल्याचे जाहीर करत देशांतर्गत बाजारात वाहनविक्रीचा उच्चांक गाठला आहे.

नवी दिल्ली- वाहन उद्योगाने जागतिक मंदीच्या सावटातून बाहेर आल्याचे जाहीर करत देशांतर्गत बाजारात वाहनविक्रीचा उच्चांक गाठला आहे. जानेवारी महिन्यातील वाहनविक्रीच्या तुलनेत फेब्रुवारी महिन्यातील वाहनविक्रीत घसघशीत 35 टक्क्यांची वाढ झाली आहे. फेब्रुवारी महिन्यात गेल्या वर्षी 8 लाख 37 हजार 17 गाड्या विकल्या गेल्या होत्या. त्या तुलनेत यावर्षी फेब्रुवारी महिन्यात 11 लाख 29 हजार 783 गाड्यांची विक्री झाली आहे.

जानेवारी महिन्यात 11 लाख 14 हजार 157 गाड्यांची विक्री झाली होती. फेब्रुवारी महिन्यात यापेक्षा अधिक विक्रीची नोंद झाली असल्याचे वाहन उत्पादकांच्या सियाम या संघटनेने सांगितले आहे. प्रवासी वाहनांची विक्री गेल्या वर्षीच्या 1 लाख 15 हजार 505 गाड्यांच्या तुलनेत यंदा 1 लाख 53 हजार 845 गाड्या झाली आहे. या विभागातील विक्रीची ही सलग 11व्या महिन्यातील वाढ आहे. मारुती सुझुकी, ह्युंदाई मोटर्स आणि जनरल मोटर्स या कंपन्यांच्या विक्रीत चांगली वाढ नोंदवली गेली आहे.

अर्थसंकल्पात सीमाशुल्कात वाढ केल्यामुळे गाड्यांच्या किमतीत वाढ होण्याची शक्यता आहे. यामुळे अनेक ग्राहकांनी गाडी घेण्याचे आखलेले बेत अलीकडे आणले. त्यामुळे गाड्यांच्या विक्रीत मोठय़ा प्रमाणात वाढ झाल्याचे सियामचे महासंचालक दिलीप चेनॉय यांचे म्हणणे आहे.

Marathi Online News