नवी दिल्ली- जागतिक मंदीच्या पार्श्वभूमीवर दिलेले प्रोत्साहन पॅकेज कायम ठेवावे की नाही या मुद्दयावर वाद चालू असतानाच, 2009-10 या आर्थिक वर्षात विकासदर 7.2 टक्के राहील, असे अनुमान केंद्र सरकारच्या मध्यवर्ती सांख्यिकी संस्थेने वर्तवले आहे. पंतप्रधान मनमोहन सिंग आणि अर्थमंत्री प्रणव मुखर्जी यांनी वर्तवलेल्या विकासदराच्या अंदाजापेक्षा हा विकासदर किंचित कमी आहे.

मागील आर्थिक वर्षातील विकासदरापेक्षा मात्र हा अंदाजित विकासदर 0.6 टक्क्यांनी जास्त आहे. मागील आर्थिल वर्षात विकासदर 6.7 टक्के होता. अर्थात या आर्थिक वर्षात कृषी उत्पादनामध्ये मात्र मोठ्या प्रमाणात घट होण्याचा अंदाज केंद्र सरकारने व्यक्त केला आहे. कृषी उत्पादन गेल्या आर्थिक वर्षाच्या तुलनेत 0.2 टक्क्यांनी कमी होईल, तर सेवा क्षेत्राच्या उत्पादनामध्ये मध्यम प्रमाणात वाढ होईल, असे अनुमान आहे.  

औद्योगिक उत्पादनामध्ये मात्र 8.9 टक्क्यांनी वाढण्याचा अंदाज आहे. त्यामुळेच प्रोत्साहन पॅकेज टप्प्याटप्प्याने काढून घेण्याच्या प्रस्तावाला पुष्टी मिळणार आहे.