ब्रिटिशांच्या भारतावरील राजवटीच्या शेवटच्या काळात भारत तसेच इतर दक्षिण आशियाई देशांतील समाजाचे चित्रण करणा-या 300 दुर्मीळ चलचित्रांचा खजिना इंटरनेटवर नि:शुल्क उपलब्ध करण्यात आला आहे.

लंडन- ब्रिटिशांच्या भारतावरील राजवटीच्या शेवटच्या काळात भारत तसेच इतर दक्षिण आशियाई देशांतील समाजाचे चित्रण करणा-या 300 दुर्मीळ चलचित्रांचा खजिना इंटरनेटवर नि:शुल्क उपलब्ध करण्यात आला आहे.

केंब्रिज विद्यापीठाच्या दक्षिण आशिया अभ्यास विभागाकडे हे चलचित्रपट जतन करण्यात आले होते व गुरुवारपासून ते या विभागाच्या संकेतस्थळावर उपलब्ध करण्यात आले. हे चलचित्रपट कोणीही डाऊनलोड करू शकतो. 50 वेगवेगळ्या खासगी संग्राहकांच्या संग्रहातून हा खजिना साकारला आहे. भारत तसेच दक्षिण आशियात 1911 ते 1956 या काळात भारतात वास्तव्य केलेल्या तसेच येथे कार्यरत असलेल्या मंडळींनी या चलचित्रफिती तयार केल्या आहेत. आज आपण ज्या पद्धतीने घरगुती सोहळे चित्रीत करतो, त्या धर्तीवर या चित्रफिती तयार करण्यात आल्या आहेत.

विविध विषयांवरील हे माहितीपट असून त्यात 1947ला भारताची फाळणी झाल्यानंतर झालेला हिंसाचार ते रेल्वे उभारणीच्या, धरणांच्या कामावर कार्यरत कामगार असे विविध विषय हाताळण्यात आले आहेत. मुंबई आणि बंगाल प्रांताचे गव्हर्नर म्हणून काम केलेल्या लॉर्ड ब्रेबर्न यांच्या दफनविधीचाही एक माहितीपट या संग्रहात आहे. 

या चित्रपटांमुळे सुमारे 60 वर्षापूर्वीचा काळ पुन्हा जिवंत होईल. फाळणीसारखी घटना व तिचे परिणाम तुम्हाला तुमच्या डोळ्यांनी पाहता येतील, असे आशियाई अभ्यास केंद्राचे सदस्य डॉ. केव्हिन ग्रीनबँक यांनी सांगितले. या चित्रपटांचा संग्रह सुरुवातीला या केंद्राच्या पहिल्या कार्यकर्त्यां मेरी थॅचर यांनी केला.

Marathi Online News