ऑस्कर पुरस्कार सोहळ्यापूर्वी ‘सीएनएन’ने जाहीर केलेल्या आशिया खंडातील 25 सर्वोत्कृष्ट कलाकारांच्या यादीत गुरुदत्त, मीना कुमारी, नर्गिस, प्राण आणि अमिताभ बच्चन या पाच भारतीय कलाकारांची नावे आहेत.

न्यूयॉर्क- जुने हिंदी चित्रपट आणि त्यातील कलाकारांची अभिनयशैली आजही भारतीयांबरोबरच जगभरातील प्रेक्षकांच्या मनावर राज्य करत आहे. ऑस्कर पुरस्कार सोहळ्यापूर्वी ‘सीएनएन’ने जाहीर केलेल्या आशिया खंडातील 25 सर्वोत्कृष्ट कलाकारांच्या यादीत समाविष्ट असलेली गुरुदत्त, मीना कुमारी, नर्गिस, प्राण आणि अमिताभ बच्चन या पाच भारतीय कलाकारांची नावे त्याचीच साक्ष देतात. 

भारत, चीन, जपान, कम्बोडिया, सिंगापूर, थायलंड, मलेशिया आणि कोरिया या देशांतील कलाकारांच्या यादीत भारतीय कलाकारांची संख्या सर्वाधिक आहे. ‘आतापर्यंत केवळ दोनच आशियाई कलाकारांनी ऑस्कर पुरस्कारांवर आपले नाव कोरले असले तरी अनेक आशियाई अभिनेते आणि अभिनेत्रींनी आपल्या कामाचा ठसा उमटवत त्या त्या देशाचा चित्रपटांचा इतिहास बदलून टाकला आहे,’ असे ‘सीएनएन’ने म्हटले आहे. सीएनएनच्या संकेतस्थळाने ‘प्यासा’, ‘कागज के फूल’ या चित्रपटांतील अभिनयाबरोबरच विविध चित्रपटांच्या दिग्दर्शनाद्वारे भारतीय चित्रपटसृष्टीवर आपला ठसा उमटावणा-या गुरुदत्त यांची तुलना ऑर्सन वेल्स यांच्याशी केली आहे. ‘प्यासा’ या चित्रपटातील संवेदनशील कवीच्या भूमिकेसाठी त्यांचे नाव या यादीत आहे.

‘जंजीर’ चित्रपटात साकारलेल्या पोलिस इन्स्पेक्टरच्या भूमिकेबद्दल अमिताभ बच्चन यांचा या यादीत समावेश झाला आहे. भारतीय चित्रपटांतील सौम्य, शांत असणारा नायक बदलण्याचे श्रेय अमिताभ बच्चन यांना जाते, असे गौरवोद्गार ‘सीएनएन’ने काढले आहे. 300हून अधिक चित्रपटांत दिलेल्या योगदानाबद्दल दिग्गज अभिनेते प्राण यांचा या यादीत समावेश झाला आहे. प्राण यांनी भारतीय सिनेमात व्हिलनची एक वेगळी शैली त्यांनी निर्माण केली, असे ‘सीएनएन’ने म्हटले आहे. 

Marathi Online News