वायव्य पाकिस्तानातील निमलष्करी दलाच्या कॅम्पवर शनिवारी सकाळी झालेल्या आत्मघाती हल्ल्यात नऊ सैनिक ठार, तर 17 जण जखमी झाले

पेशावर- वायव्य पाकिस्तानातील निमलष्करी दलाच्या कॅम्पवर शनिवारी सकाळी झालेल्या आत्मघाती हल्ल्यात नऊ सैनिक ठार, तर 17 जण जखमी झाले. स्फोटकांनी भरलेली कार घेऊन एक दहशतवादी थेट या कॅम्पमध्ये घुसला आणि त्याने तिथे स्फोट घडवला. या स्फोटातील मृतांचा आकडा वाढण्याची शक्यता अधिका-यांनी वर्तवली आहे.

बन्नू शहरात निमलष्कराच्या दलाच्या जवानांचा सराव सुरू असतानाच लष्करी तळाच्या कार्यालयाबाहेर एका अज्ञात व्यक्तीने स्फोटकांनी भरलेली कार त्याठिकाणी आणून लावली होती. या स्फोटामुळे लष्करी तळाच्या एक मजली कार्यालयाचा काही भाग खाली कोसळला. आजूबाजूच्या घरांचेही नुकसान झाले. 

निमलष्करी दलाचे जवळपास 300 सैनिक या कॅम्पमध्ये राहत होते. अफगणिस्तान सीमेपासून जवळच उत्तर वझिरीस्तानमध्ये हे लष्करी तळ आहे. तालिबानी आणि अल्-कायदाच्या दहशतवाद्यांसाठी उत्तर वझिरीस्तान ही ‘सुरक्षित’ जागा मानली जाते. तिथून 40 किलोमीटरवर हा कॅम्प सुरू होता. आपले वर्चस्व दाखवून देण्यासाठी तालिबानी दहशतवाद्यांनीच हा हल्ला घडवून आणला असल्याची, शक्यता पोलिसांकडून वर्तविण्यात येत आहे.

Marathi Online News