इजिप्तमधील पोर्टसेड शहरात फुटबॉल सामना सुरू असतानाच प्रेक्षकांमधील दोन गटांत झालेल्या दंगलीत 74 जणांचा मृत्यू झाला.

कैरो-  इजिप्तमधील पोर्टसेड शहरात फुटबॉल सामना सुरू असतानाच प्रेक्षकांमधील दोन गटांत झालेल्या दंगलीत 74 जणांचा मृत्यू झाला, तर हजारो प्रेक्षक जखमी झाले. एकमेकांवर चाकूहल्ले आणि दगडफेक केल्याने ब-याच प्रेक्षकांचे बळी गेल्याचे पोलिसांनी सांगितले. इजिपत सरकारनेही ही अत्यंत दुर्दैवी घटना असल्याचे सांगून तीन दिवसांचा राष्ट्रीय दुखवटा जाहीर केला आहे.

पोर्टसेड क्लब मैदानावर बुधवारी संध्याकाळी अल-आहली आणि अल-मासरी या दोन क्लबमध्ये फुटबॉल सामना झाला. या सामन्यात अल-मासरी क्लबने अल-आहली क्लबवर 3-1ने विजय मिळवला. सामना संपल्यानंतर काही प्रेक्षकांनी गोंधळ घालत एकमेकांवर बाटल्या फेकायला सुरुवात केली. थोड्याच वेळात त्याची परिणती दंगलीत झाली. दोन्ही क्लबच्या चाहत्यांनी दगडफेक करण्यास सुरुवात केली, काहींनी एकमेकांवर चाकूहल्ले केले, तर काहींनी मैदानावर आगी लावल्या.

इजिप्त सरकारने या घटनेची निंदा केली असून या घटनेचा ठपका पोलिसांवरच ठेवला आहे. पोलिस आणि येथील सुरक्षा रक्षकांनी दंगल शमवण्यासाठी काहीच प्रयत्न न केल्याचे इजिप्तच्या गृहमंत्र्यांनी सांगितले.

Marathi Online News