दक्षिण भारताच्या किनारपट्टीला शुक्रवारी थाने चक्रीवादळाने झोडपल्यानंतर शनिवारी वादळ शमले असून या वादळात 33 जणांचा बळी गेला आहे.

रामेश्वरम / तिरुअनंतपूरम- दक्षिण भारताच्या किनारपट्टीला शुक्रवारी थाने चक्रीवादळाने झोडपल्यानंतर शनिवारी वादळ शमले आहे. या वादळात 33 जणांचा बळी गेला आहे. तर सुमारे 20 हजार लोकांना मदत शिबीराचा आश्रय घ्यावा लागला आहे. शुक्रवारच्या चक्रीवादळानंतर शनिवारी केरळला मुसळधार पावसाने झोडपून काढले. या पावसामुळे तीन जणांचे बळी गेले आहेत. तर मोठय़ा प्रमाणावर वित्तहानी झाली आहे. वादळामुळे केरळात पाऊस झाल्याचे हवामान विभागाने म्हटले आहे. पावसामुळे नववर्षाच्या स्वागताच्या उत्साहावर पाणी पडले आहे.दरम्यान, वादळाचा तडाखा बसलेल्या भागात मदतकार्याला वेग आला असून जनजीवन हळूहळू पूर्वपदावर येत आहे.  

पद्दुचेरी शहरातील जनजीवन झपाटय़ाने पूर्वपदावर येत आहे. तिथे बचावदलाच्या अथक परिश्रमांमुळे शनिवारी रस्ते आणि रेल्वे वाहतूक सुरू करण्यात आली आहे. शहरातील वीजपुरवठाही टप्प्याटप्प्याने सुरू करण्यात येत आहे. दरम्यान, नववर्षाच्या स्वागतासाठी देश विदेशातून पद्दुचेरीत जमलेल्या पर्यटकांच्या उत्सवावर पाणी पडले आहे. शहरात इंधनाचा तुटवडा भासत आहे. पर्यटनाच्यादृष्टीने शहर पूर्वपदावर येण्यासाठी किमान दोन आठवडय़ांचा कालावधी लागेल असे अधिकाऱ्यांनी सांगितले आहे. दरम्यान, राज्याच्या काही भागात पावसाच्या सरी कोसळण्याची शक्यता हवामान खात्याने वर्तवली आहे.

केरळमध्ये शुक्रवारी रात्रीपासून पावसाला सुरुवात झाली असून वादळामुळे काही भागात पावसाची शक्यता हवामान खात्याने वर्तवली आहे. या पावसामुळे रेल्वे आणि रस्ते वाहतूकीवरही परिणाम झाला आहे. तसेच सबरीमल्ला यात्रेसाठी आलेले हजारो भाविक अडकून पडले आहेत.

तातडीची मदत म्हणून सरकारने 10 हजार रुपयांची मदत जाहीर केली आहे. तर पूर्णपणे उद्ध्वस्त झालेल्या घरांसाठी 1 लाख रुपयांची मदत जाहीर करण्यात आली आहे. वादळामुळे भरकटलेल्या चार भारतीय मच्छिमारांना श्रीलंकेच्या नौदलाने अटक केली होती. त्यांची श्रीलंकेच्या नौदलाकडून मुक्तता करण्यात आली आहे. लंकेच्या ताब्यातील इतर भारतीय मच्छिमारांनाही मुक्त करावे अशी मागणी होत आहे.

Marathi Online News