संरक्षण सचिव खालीद लोधी यांच्या हकालपट्टीमुळे सरकार आणि लष्करामधील तणाव वाढला असून पाकिस्तानमध्ये लष्करी राजवटीची शक्यता आहे.

इस्लामाबाद- मेमो प्रकरणावरून पाकिस्तान सरकार आणि लष्करातील बेबनावात आणखी भर पडली असून लष्करप्रमुख कयानी यांचे निकटवर्तीय समजले जाणारे संरक्षण सचिव लेफ्टनंट जनरल (निवृत्त) खालीद नईद लोधी यांची हकालपट्टी करण्यात आली आहे. लोधी यांच्या हकालपट्टीमुळे सरकार आणि लष्कर यांच्यातील संघर्ष आणखी तीव्र होण्याची शक्यता असून पाकिस्तानमध्ये पुन्हा एकदा लष्करी राजवट येण्याची शक्यता आहे.

पंतप्रधान युसूफ रझा गिलानी यांनी ही कारवाई केली. परिस्थिती नीट न हाताळणे आणि बेकायदेशीर कारवाई केल्याप्रकरणी त्यांची हकालपट्टी करण्यात आली असल्याचे पंतप्रधान कार्यालयाने जारी केलेल्या निवेदनात म्हटले आहे. पंतप्रधानांच्या अखत्यारित असणा-या सर्वच संवेदनशील संस्थांमध्ये लोधी यांनी गैरसमजूत निर्माण केल्याप्रकरणी ही कारवाई करण्यात आल्याचे निवेदनात म्हटले आहे. मंत्रिमंडळ सचिव नर्गीस सेठी यांच्याकडे संरक्षण सचिव पदाचा अतिरिक्त भार सोपवण्यात आला आहे.

पंतप्रधानांच्या याप्रकाराबद्दल लष्कर प्रमुखांनी प्रखर विरोध केला असून सरकारने खूपच कडक पावले उचलली असल्याची प्रतिक्रीय त्यांनी व्यक्त केली आहे.

लष्करप्रमुख अशफाक परवेझ कयानी व आयएसआय प्रमुख लेफ्टनन जनरल अहमद शुजा पाशा यांनी याचे गंभीर परिणाम होतील असे आव्हानच सरकारला दिले आहे.

Marathi Online News