न्यायालयाच्या अवमानप्रकरणी पाकिस्तानचे पंतप्रधान युसूफ रजा गिलानी यांना न्यायालयाने नोटीस बजावली असून 13 फेब्रुवारी रोजी न्यायालयात हजर राहण्याचे आदेश दिले आहेत.

इस्लामाबाद- न्यायालयाच्या अवमानप्रकरणी पाकिस्तानचे पंतप्रधान युसूफ रजा गिलानी यांना सर्वोच्च न्यायालयाने नोटीस बजावली असून 13 फेब्रुवारी रोजी न्यायालयात हजर राहण्याचे आदेश दिले आहेत. गिलानी न्यायालयात उपस्थित झाल्यानंतर त्यांच्यावर अधिकृतरित्या आरोपपत्र दाखल करण्यात येईल व त्यानंतर त्यांच्यावर अवमानप्रकरणी खटला चालवण्यात येईल असे संकेतही न्यायालयाने दिले आहेत.

नेत्यांविरोधातील बंद केलेले खटले पुन्हा चालवण्याचे आदेश न्यायालयाने दिले होते. न्यायालयाच्या या निर्णयावर गिलानी यांनी आक्षेप घेत बंद खटले सरकार पुन्हा चालवू शकत नाही असे मत व्यक्त केले होते.गिलानी यांच्या या वक्तव्यामुळे तसेच पाकिस्तानचे अध्यक्ष आसिफ अली झरदारी यांच्यासह अनेक राजकीय नेत्यांविरोधात भ्रष्टाचाराप्रकरणी कारवाई सुरू न केल्यामुळे गिलानी यांना सर्वोच्च न्यायालयाच्या रोषाला सामोरे जावे लागले होते तसेच त्यांना न्यायालयाने अवमान नोटिस बजावली होती.

सर्वोच्च न्यायालयाच्या निर्णयानंतर गिलानी यांनी कोणत्याही प्रकारचा अवमान केला नसून त्यांना न्यायालच्या निर्णयाचा आदर असल्याचा युक्तीवाद गिलानी यांचे वकील ऐतजाज एहसान यांनी गुरुवारी केला.

मात्र,या युक्तीवादानंतर सात न्यायाधीशांच्या खंडपीठाचे प्रमुख न्यायमूर्ती नसिर-उल-मुल्क यांनी गिलानी यांना 13 फेब्रुवारीला न्यायालयात हजर राहण्याचे आदेश दिले.

Marathi Online News