रश्दी यांनी केलेले आरोप राजस्थान सरकारने फेटाळले आहेत. हे आरोप चुकीचे असून, त्यांची हत्या करण्याचे प्रयत्न होणार असल्याची माहिती गुप्तचरांकडून मिळाली होती, असे स्पष्टीकरण राजस्थान सरकारने दिले आहे. त्यांच्या जिवाला धोका असल्याची माहिती मिळाल्यामुळेच, त्यांच्या आणि या महोत्सवाच्या सुरक्षेसाठी राज्य सरकारने कडेकोट सुरक्षा व्यवस्था तैनात केली होती, असे राजस्थानचे मुख्यमंत्री अशोक गेहलोत यांनी सांगितले. ‘केंद्रीय पातळीवरून एखादी खबर दिली जाते, तेव्हा तिची दखल घ्यावी लागते. रश्दी हे भारतीय वंशाचे असल्यामुळे त्यांना व्हिसाची गरज नव्हतीच. पण जिवाला धोका असल्याची माहिती मिळाल्यामुळे त्यांच्या सुरक्षेची जबाबदारी राजस्थान सरकारवर आली होती. लोकप्रिय महोत्सवांमध्ये अशा वेळी काही काळजी घ्यावी लागते.’ दरम्यान, जयपूर साहित्य महोत्सवात रश्दी यांच्या वादग्रस्त पुस्तकाचे वाचन केल्याबद्दल संबंधितांवर न्यायालयीन कारवाई करण्याची मागणी काही मुस्लिम संघटनांनी केली आहे.