इंग्लंडमध्ये शिक्षणासाठी गेलेल्या पुण्यातील विद्यार्थ्याची सोमवारी इंग्लंडमधील मॅंचेस्टर येथे झालेल्या हत्येप्रकरणी पोलिसांनी चौघांना अटक केली.

लंडन- हल्लेखोरांनी वेळ विचारली असता ती सांगण्यास अनुज बिडवेने नकार दिल्यावर त्याची हत्या करण्यात आली, असा दावा लंडन पोलिसांनी केला आहे. ही हत्या वर्णद्वेषातून झाल्याचा आरोप त्यांनी फेटाळून लावला आहे. या प्रकरणी मँचेस्टर पोलिसांनी चार जणांना अटक केली.

पुण्यात राहणार अनुज लँकेस्टर विद्यापीठात मायक्रो इलेक्ट्रॉनिक्सचे शिक्षण घेत होता. ख्रिसमस साजरा करण्यासाठी तो आणि त्याचे मित्र मँचेस्टर शहरातील सॉल्फर्ड भागात गेले होते. घरी परतत असताना दोन तरुणांनी त्याला वेळ विचारली. ती सांगण्यास नकार दिल्याने त्यापैकी एकाने बंदूक काढली आणि अनुजच्या डोक्यावर गोळी झाडली.

या हल्ल्यानंतर घाबरलेले त्याचे मित्र त्याला सोडून पळून गेले. मात्र या भागात राहणारी शीतर पटेल ही केक उत्पादक तरुणी त्यांच्या मदतीला धावून आली. ‘अनुजला वैद्यकीय मदत पुरवण्यासाठी मी पुरेपूर मदत केली. त्याचा श्वासोश्वास सुरू होता. त्यामुळे त्याला डॉक्टरकडे घेऊन मी निघाले. मात्र उपचारांअभावी तो जास्त वेळ जिवंत राहू शकला नाही,’ असे शीतलने सांगितले.

अनुज हा अत्यंत हुशार विद्यार्थी होता. आपल्या हुशारीच्या जोरावर त्याने अल्पावधीतच खूप प्रगती केली होती. त्याच्या हत्येमुळे आम्हांला मोठा धक्का बसला असल्याची प्रतिक्रिया लॅकेस्टर विद्यापीठाचे उपकुलगुरू प्रो. बॉब मॅक्न्ले यांनी व्यक्त केली.

Marathi Online News