गेल्याच आठवड्यातली गोष्ट

जगातील सर्वाधिक खेळल्या जाणा-या फुटबॉलचा विश्वविजेता ठरवणारी स्पर्धा नुकतीच संपली. महिनाभराचा थरार, प्रत्येक सामन्यागणिक वाढणारा रोमांच, सेकंदाच्या आत निकाल बदलवणारा खेळ अशा अनुभवाने जगभरातील फुटबॉलरसिक आणि सर्वसामान्यांनाही वेड लावले. पण ‘पायांनी खेळण्याच्या’ (फुटबॉल) या स्पर्धेत या थरारक अनुभवापेक्षाही मोठी क्रेझ राहिली ती पॉल ऑक्टोपस नावाच्या आठ पायांच्या ‘ज्योतिषी’ची. सामन्यातला विजेता कोण बनणार नि वर्ल्डकप कोण जिंकणार याचं अचूक भाकित वर्तवणारा पॉल आज सेलिब्रिटींच्या यादीत जाऊन बसला आहे. माणसांच्या जिवनाशी निगडित घडामोडींचं भविष्य सांगणारा पॉल ऑक्टोपस हा पहिलाच प्राणी नाही. पोपट, साप, कासव या प्राण्यांच्या आधारे वर्षानुवर्षे भविष्याचे आडाखे बांधले गेले आहेत. भारतास अंधश्रद्धाळू ठरवणाऱ्या पाश्चिमात्य देशांतही प्रचलित असलेला हा प्रकार अंधश्रद्धेचा की पॉलच्या ‘सिक्स्थ सेन्स’चा, हा वादाचा विषय असू शकतो. तूर्तास मात्र पॉल ऑक्टोपस, मणी पोपट आणि हॅरी मगर यासारख्या प्राण्यांची चलती आहे.