वृत्तपत्र क्षेत्रात गेल्या वर्षभरात गौरवास्पद नावलौकिक मिळवणा-या ‘प्रहार’ने सामान्यांच्या प्रश्नांना वाचा फोडावी, असे आवाहन राज्याचे महसूलमंत्री आणि ‘प्रहार’चे संपादकीय सल्लागार नारायण राणे यांनी ‘प्रहार’च्या सावंतवाडी कार्यालयाच्या उद्घाटनप्रसंगी केले.

सावंतवाडी- वृत्तपत्र क्षेत्रात गेल्या वर्षभरात गौरवास्पद नावलौकिक मिळवणा-या ‘प्रहार’ची सामाजिक, शैक्षणिक आदी विधायक माहिती आणि ज्ञान वाचकांपर्यंत तात्काळ पोहोचवणारे वृत्तपत्र म्हणून ओळख निर्माण झाली आहे. ‘प्रहार’ने अशीच प्रगती करावी आणि सर्वसामान्यांच्या प्रश्नांना वाचा फोडावी, असे आवाहन मंगळवारी राज्याचे महसूलमंत्री आणि ‘प्रहार’चे संपादकीय सल्लागार नारायण राणे यांनी ‘प्रहार’च्या सावंतवाडी कार्यालयाच्या उद्घाटनप्रसंगी केले.

सावंतवाडी-रामेश्वर प्लाझा येथे ‘प्रहार’च्या सावंतवाडी कार्यालयाचे उद्घाटन नीलमताई राणे यांच्या हस्ते झाले. या वेळी खासदार डॉ. निलेश राणे, आमदार राजन तेली, ‘प्रहार’चे कार्यकारी संपादक शशी सावंत, निवासी संपादक संतोष वायंगणकर, नगराध्यक्ष पल्लवी के सरकर, जि. प. अध्यक्ष रेखा कदम, जिल्हा बँकेचे अध्यक्ष गजानन गावडे आदी उपस्थित होते.

पुणे, कोल्हापूर, सांगली, सातारा येथे ‘प्रहार’च्या आवृत्त्या सुरू होणार आहेत. त्यानंतर मराठवाडा, विदर्भ आदी ठिकाणीही ‘प्रहार’ उपलब्ध होईल, असे राणे यांनी या वेळी जाहीर केले. प्रामाणिकपणा आणि सत्याच्या जोरावर ‘प्रहार’ने मुंबई आणि कोकणात प्रगती केली आहे. विधायक विकासकामांना सातत्याने पाठबळ दिले आहे, असेही राणे यांनी सांगितले.

Marathi Online News