प्रहारच्या फेसबुक पेजला 'लाइक' करा

शेतक-यांना दिलासा देण्यासाठी कापसाला साडेचार हजार रुपये प्रति क्विंटल हमीभाव देण्यात यावा, अशी मागणी विदर्भ जनआंदोलन समितीने केली आहे. ही मागणी मान्य न झाल्यास 2 ऑक्टोबरपासून राज्यभरात आंदोलन करण्याचा इशारा समितीने दिला आहे.

वर्धा- अतिवृष्टीमुळे देशभरातील 110 लाख हेक्टरमधील कापसाचे पीक धोक्यात आल्याने त्याचा शेतक-यांना मोठा फटका बसणार आहे. त्यामुळे शेतक-यांना दिलासा देण्यासाठी कापसाला साडेचार हजार रुपये प्रति क्विंटल हमीभाव देण्यात यावा, अशी मागणी विदर्भ जनआंदोलन समितीने केली आहे. ही मागणी मान्य न झाल्यास 2 ऑक्टोबरपासून राज्यभरात आंदोलन करण्याचा इशारा समितीने दिला आहे.

यंदा बीटी बियाणांची विक्रमी 110 हेक्टरवर पेरणी करण्यात आल्याचे केंद्र सरकारने जाहीर केले आहे. राज्यात कापसाचे क्षेत्र 42 लाख हेक्टर असून त्यातील तब्बल 28 लाख क्षेत्र विदर्भात आहे. विदर्भ आणि मराठवाडय़ात अतिवृष्टीमुळे कापसाचे नुकसान होण्याची शक्यता असल्याने आधीच कर्जबाजारी असलेल्या शेतक-यांची चिंता वाढली आहे. कापसावर प्रत्येक शेतक-याला हेक्टरमागे 25 हजार रुपये खर्च झाले आहेत. त्यामुळे हे पीक धोक्यात आल्यास शेतक-यांना 27 हजार 500 कोटी रुपयांचा फटका बसणार आहे.

पश्चिम विदर्भातील हे कृषिसंकट आता संपूर्ण विदर्भासह मराठवाडा, खानदेश आणि उत्तर महाराष्ट्रातही पसरले आहे. त्यामुळे 30 लाख शेतक-यांना दिलासा देण्यासाठी कापसाचा हमीभाव साडेचार हजार रुपये प्रति क्विंटल करणे आवश्यक आहे, असे समितीच्या किशोर तिवारी यांनी सांगितले. पेरणीच्या एकूण खर्चाचा तपशील केंद्र आणि राज्य सरकारकडे पाठवण्यात आला आहे.

• कपाशीवर ‘पांढरी माशी’चा प्रादुर्भाव

Marathi Online News