पुण्यातील येरवडा तुरुंगाच्या अधीक्षकांना न्यायालयाच्या अवमानाबद्दल ‘कारणे दाखवा’ नोटिस बजावली आहे.

मुंबई- गर्भाशयाचा कर्करोग असलेल्या एका महिला कैद्याला उपचारांसाठी मुंबईतील रुग्णालयात दाखल करण्याचे आदेश दिलेले असतानाही पुण्यातील येरवडा तुरुंगाच्या अधीक्षकांनी त्याचे पालन न केल्याने शुक्रवारी उच्च न्यायालयाने तीव्र नापसंती व्यक्त केली. तसेच या अधीक्षकांना न्यायालयाच्या अवमानाबद्दल ‘कारणे दाखवा’ नोटिसही बजावली. तसेच पुढील तारखेच्या सुनावणीस त्यांना हजर राहण्यास सांगताना त्यासाठीचा खर्च स्वत:च्या खिशातूनच करायचा, असाही आदेश न्यायालयाने दिला.

या पार्श्वभूमीवर, शालिनीने उच्च न्यायालयात पुन्हा एकदा हंगामी जामिनासाठी अर्ज केला. तो शुक्रवारी न्या. ए. एम. खानविलकर व न्या. यु. डी. साळवी यांच्या खंडपीठासमोर सुनावणीस आला. तेव्हा शालिनीच्या वकील इंद्रायणी कोपरकर यांनी, तुरुंग प्रशासनाने न्यायालयीन आदेश असतानाही शालिनीला मुंबईत हलवलेच नसल्याचे निदर्शनास आणले. याबद्दल खंडपीठाने विचारणा केली असता शालिनीवर पुण्यातील ससून रुग्णालयात उपचार सुरू असल्याचे सरकारी वकिलांनी सांगितले. मात्र, ‘ती कैदी आहे म्हणून तिला उपचार घेता येऊ नयेत का? मग न्यायालयाच्या आदेशाचे पालन का झाले नाही’, या न्यायालयाच्या प्रश्नांवर त्यांना समाधानकारक उत्तर देता आले नाही. अखेर तुरुंग अधीक्षकांच्या वागणुकीबद्दल आश्चर्य व्यक्त करतानाच खंडपीठाने त्यांना वरीलप्रमाणे नोटिस बजावली.

Marathi Online News