आम्ही वाचक 'प्रहार'चे

‘प्रहार’ची मला जाणवलेली सगळ्यात जमेची आणि सकारात्मक बाजू म्हणजे साहित्यिक आणि सांस्कृतिक क्षेत्रातल्या घडामोडींना चांगली जागा दिली जाते. या क्षेत्रातल्या घडामोडींबद्दलचे खोल आकलन, भानही त्यातून दिसते. त्यामुळे अतिशय गंभीर, सकस आणि समृद्ध करणारे लेखन त्यात वाचायला मिळते. समाजातल्या समकालीन प्रश्नांना लगटून असणारे कालचे आणि उद्याचेही प्रश्न समजून घेऊन हे विषय मांडणा-या पत्रकारांना या यशाचे श्रेय जाते.      

   

  नागेश भोसले, अभिनेता

प्रहार आजच्या युवकांचे वृत्तपत्र आहे, त्यांच्यासाठी विविध विषयांवरची माहिती असते, त्याचबरोबर विविध सदरांमधूनही सकारात्मकता जपली आहे. एका राजकीय नेतृत्वाचे हे वृत्तपत्र असूनही त्यातल्या बातम्या निरपेक्ष असतात. समाजाच्या विकासाचा ध्यास त्या बातम्यांमधून सहज दिसून येतो. एक स्वतंत्र आणि निरपेक्ष बातम्या देणारे हे वृत्तपत्र आहे. प्रहारने यापुढील काळातही अशाच उत्साहात आपली वाटचाल सुरू ठेवावी. 

 अरुण केदार, राष्ट्रीय कॅरम विजेता 

‘प्रहार’ वर्तमानपत्रात स्पोर्ट्ससाठी बरीच जागा मिळते, ही माझ्यासारख्या खेळाडूसाठी आनंदाची बाब. राष्ट्रीय, आंतरराष्ट्रीय स्तरावरील बातम्यांना प्रसिद्धी मिळते. तसेच देशी खेळांनाही चांगले ‘कव्हरेज’ दिले जाते. कबड्डी, खो-खो, मल्लखांब, कॅरम या दुर्लक्षित क्रीडा प्रकारांनाही योग्य न्याय दिला जात आहे. ‘प्रहार’मधील लेख वाचनीय आहेतच. तसेच पेपरचा दर्जा, आकर्षक मांडणी आणि रचना इतर वर्तमानपत्रांच्या तुलनेत सरस आहे.

 जयू भाटकर, दूरदर्शन निर्माते 

वृत्तपत्रसृष्टीत ‘प्रहार’चे आगमन झाले तेव्हा नारायण राणेंचे वृत्तपत्र म्हणजे राजकीयच असणार, असे वाटले होते. मात्र ‘प्रहार’ वाचत राहिल्यावर कालांतराने या शंका गळून पडल्या. आता तर दररोज सकाळी ‘प्रहार’ वाचल्याशिवाय मनाला स्वस्थता लाभत नाही. आकर्षक मांडणी, उत्तम बातम्या तसेच वाडीवस्ती, हृद्गत अशी एकाहून एक सदरे असलेल्या वाचनीय पुरवण्या यामुळे हे वृत्तपत्र राज्यातील प्रतिष्ठित वृत्तपत्रांच्या पंक्तीत जाऊन बसले आहे. एकंदरीत नाव ‘प्रहार’ असले तरी हे दैनिक म्हणजे साहित्यिक उपहार-अलंकार आहे..     

आणखी काही वाचकांनी व्यक्त केलेले मनोगत...   

प्रिय ‘प्रहार’..

आज तू एक वर्षाचा झालास त्याकरिता तुझे अभिनंदन! या एक वर्षात तू घेतलेल्या गुटगुटीत बाळशाने तू आम्हा सर्वाचा लाडका बनलास . तुझे संपादकीय तर नि:पक्षपातीच असते. सोमवारी तू बुकमार्क म्हणून येतोस व नवीन-जुन्या पुस्तकांचे समीक्षण करतोस. त्यामुळे मला वाचनाची गोडी जरा जास्तच लागली. मंगळवारचा तुझा सायफाय, जग किती पुढे गेलंय, याची आठवण करून देतो. बुधवारी येताना श्रद्धा-संस्कृतीचं देश-विदेशातील दर्शनच घडवतो. गुरुवार-शुक्रवार तर माझा विशेष लाडोबा होतोस. स्त्रीविधामधून मला घडवतोस. स्त्रियांचे अनके प्रश्न अगदी आरोग्यापासून ते घर कसं सुटसुटीत व छान ठेवायचं, हे तू सांगतोस. शनिवारी मी थकलेली असते म्हणूनच रिलॅक्सचा आनंद देतो. ‘मॅड’व्हेंचरमधून जग फिरवून आणतोस. रविवारी तर मज्जाच मज्जा. दुपारी ‘चमचमीत’ काय हे सांगतोस. घरबसल्या कुठलं नाटक, कुठला सिनेमा कसा आहे, याची माहिती देतोस. दिवसेंदिवस प्रगती घडवत जातोस. रोजच्या रोज ‘अपटुडेट’ ठेवतोस मला. आता तू एक वर्षात एवढी ‘भरारी’ घेतलीस. नक्कीच पुढे भविष्यात ‘प्रहार’ चॅनल सुरू करून नवीन भांवडं आण. तिथे तुला जपणारे पत्रकार मित्र-मैत्रिणी असतील त्यांना ‘बेस्ट ऑफ लक’ दे .-

स्वाती पुनाळेकर  

नि:स्पृह दैनिक‘प्रहार’च्या पहिल्या वर्धापनदिनानिमित्त आपल्याला प्रथमत: मन:पूर्वक हार्दिक शुभेच्छा! आपले दैनिक सुरू होऊन म्हणता-म्हणता वर्ष झाले. ज्या पार्श्वभूमीवर ‘प्रहार’चं प्रकाशन झालं तेव्हा सदर वर्तमानपत्र प्रचारी थाटाचं, एकांगी राजकीय विचारसरणीला प्रोत्साहन देणारं असेल, अशी शंका अनेकांच्या मनात डोकावून गेली. परंतु वर्षभरातील आपली पत्रकारिता बघता आपलं वर्तमानपत्र हे संपूर्ण स्वतंत्र बाण्याचं-मराठी अस्मिता जपणारं, निर्भिड, निरपेक्ष व नि:स्पृह वृत्तीने चालवलेलं दैनिक आहे. स्पष्ट विचार, सुरेख छपाई, स्वच्छ कागद व त्याहूनही महत्त्वाचं म्हणजे स्पष्ट व परखड विचार देणारं ‘प्रहार’ हे वर्तमानपत्र एकाच वर्षात मराठीतील एक अग्रगण्य वर्तमानपत्र झालं आहे. निर्भिड लोकाभिमुख पत्रकारिता व सर्वसमावेशक विचार सातत्याने वाचावयास मिळतील, याची खात्री वाटते.

- शरद वर्तक, चेंबूर 

वाटचालीस शुभेच्छा!

‘प्रहार’ वर्षाचा झाला. अभिनंदन! दर्जेदार बातम्या, विशेषकरून आमच्या कोकणातल्या गाव, तालुका, जिल्हा स्तरावरील इत्थंभूत माहिती आम्हाला दै. ‘प्रहार’मुळे मिळते. ‘अपटुडेट’ या पानावर नैसर्गिक चित्रं, आरोग्यविषयी नामांकित डॉक्टरांचा सल्ला, राशिभविष्य, स्मरण, प्रसिद्ध व्यक्तींचे चित्र, माहिती, लेडीज स्पेशल वाचायला मिळतात. नागरिकांची विविध विषयांवरील मते, राजकीय विषयांवर मान्यवरांचे लेखन संपादकीय पानावर आढळते. राणेसाहेबांनी विरोधकांना दिलेली रोखठोक उत्तरे प्रहार करून जातात.

विनायक वाडेकर, नेरूळ

प्रगतीपथावर राहा

आज ९ ऑक्टोबर २००९ रोजी ‘प्रहार’चा पहिला वाढदिवस आहे. तरी तिथीप्रमाणे तो दस-यालाच झाला. गेल्या वर्षभरात ‘प्रहार’ने खूप मोठय़ा घडामोडी, लेख यांचं चांगल्या प्रकारे लेखन केलं. ‘प्रहार’ने स्वत:चं असं महत्त्वाचं स्थान निर्माण केलं आहे. त्याने मनोरंजन, साहित्य, क्रीडा यांची योग्य प्रकारे दखल घेतली, त्याबद्दल संपादक, प्रकाशक, सर्व पत्रकार व अन्य कर्मचारीवर्ग यांचं हार्दिक अभिनंदन! ‘प्रहार’ची प्रगती अशीच होत राहो अशीच प्रार्थना. पुन्हा ‘प्रहार’चं मन:पूर्वक अभिनंदन! -

लता सावंत, डोंबिवली 

आवडणारा अंक

प्रत्येक अंक हा नावाप्रमाणे ‘प्रहार’ करणारा आहे. निरनिराळ्या विषयांवरची माहिती असते. वाचनीय सदरे, संपादकीय, मतपेटी याद्वारे लोकांना आपली निरनिराळ्या विषयांवरची मतं मनमोकळेपणाने मांडता येतात. देशी व परदेश, आरोग्याविषयी बरीच माहिती दिलेली असते. ‘शेअर बाजार’चा चढउतार, रोजचं पंचाग, राशिभविष्य, अर्थजगत, क्रीडा, स्त्रीविधा हेही विचार मांडून जातात. एकंदरीत ‘प्रहार’चा अंक पहिल्या दिवसापासून वाचनीय आहे.

मधुकर धोकटे, माहीम