ग्रामीण भागात दहा वर्षांहून अधिक काळ सेवा केलेल्या आरोग्यसेवेतील डॉक्टरांना सेवेत कायम न करता पुन्हा दुर्गम भागातच सेवा करण्याच्या आदेशाविरोधात आरोग्यसेवा पूर्णत: बंद करण्याचा इशारा मॅग्मोने दिला आहे.

मुंबई- ग्रामीण भागात दहा वर्षांहून अधिक काळ सेवा केलेल्या आरोग्यसेवेतील डॉक्टरांना सेवेत कायम न करता जुन्या नियमांना धाब्यावर बसवून नवीन निकष लावत त्यांना पुन्हा दुर्गम भागातच सेवा करण्याचे आदेश आरोग्य खात्याने दिले आहेत. या अजब निर्णयाविरोधात मंगळवारपासून राज्यातील आरोग्यसेवा पूर्णत: बंद करण्याचा इशारा महाराष्ट्र राजपत्रित वैद्यकीय गट अ संघटनेने (मॅग्मो) दिला आहे.

राज्यातल्या ग्रामीण भागात रुग्णांना योग्य प्रमाणात आरोग्य सुविधा मिळत नाहीत. एकीकडे आरोग्यसेवा विभाग ग्रामीण भागात डॉक्टर नसल्याची आरडाओरड करत असतानाच दुसरीकडे दुर्गम भागात दहा वर्षाहून अधिक काळ सेवा करूनही त्यांना सेवेत कायम न करण्याचा प्रकार मंत्रालयातील सरकारी बाबूंच्या ‘कृपादृष्टीने’ सुरू असल्याचा आरोप संघटनेने केला आहे.

Marathi Online News