दरवर्षीप्रमाणेच यंदाही प्रत्येक दहीहंडीच्या ठिकाणी थरांचा थरार अनुभवण्यासाठी प्रचंड गर्दी जमली होती. मुंबई-ठाण्यातील मानाच्या आणि लाखाच्या हंडय़ा गुरुवारी सायंकाळपर्यंत फुटल्या नव्हत्या. मात्र गल्लोगल्ली, चौकाचौकात लावलेल्या हंडय़ा फोडण्यासाठी जमलेल्या गोविंदांच्या ‘शोर’ने शहरात दिवसभर जल्लोषाचे वातावरण होते.

मुंबई : ‘मच गया शोर सारी नगरी रे, आया बिरजका बांका संभाल तेरी गगरी रेऽऽऽ..’च्या तालात एकावर एक थर रचत, कोसळत आणि पुन्हा वर चढून हंडी फोडत गोविंदांनी मुंबई-ठाणेकरांसह टीव्हीवरून हा थरार पाहणा-या देशभरातील जनतेच्या डोळय़ांचे पारणे फेडले. विश्वास, एकाग्रता, एकता, आत्मविश्वास यांच्या जोरावर विजयाचा शेवटचा थर रचत दहीहंडी फोडल्यानंतर होणा-या जल्लोषात सारेच सहभागी होत होते. दरवर्षीप्रमाणेच यंदाही प्रत्येक दहीहंडीच्या ठिकाणी थरांचा थरार अनुभवण्यासाठी प्रचंड गर्दी जमली होती. मुंबई-ठाण्यातील मानाच्या आणि लाखाच्या हंडय़ा गुरुवारी सायंकाळपर्यंत फुटल्या नव्हत्या. मात्र गल्लोगल्ली, चौकाचौकात लावलेल्या हंडय़ा फोडण्यासाठी जमलेल्या गोविंदांच्या ‘शोर’ने शहरात दिवसभर जल्लोषाचे वातावरण होते.

याबरोबरच परळमधील सदाकांत ढवण मैदान, वरळीतील संकल्प, घाटकोपरमधील राम कदम मित्र मंडळ, कांदिवली गावातील ‘स्वाभिमान’च्यावतीने बांधण्यात आलेली दहीहंडी, अंधेरी रेल्वे स्थानकाबाहेरील हंडी ही ठिकाणे रसिकांचे आकर्षण केंद्र बनली होती. या दहीहंडी फोडण्यासाठी अनेक मंडळांनी प्रयत्न केला. परंतु दुपापर्यंत या दहीहंडी फोडण्यास त्यांना यश न आल्याने सलामी देत अनेक गोविंदांनी उत्तेजनार्थ बक्षिसांची लयलूट केली.

Marathi Online News