PRAHAAR | ONLINE MARATHI NEWS: टीएमटीतील 63 कर्मचारी बडतर्फ

टीएमटीतील 63 कर्मचारी बडतर्फ
================================================================================
प्रहार प्रतिनिधी  on 07 September, 2010 10:38:00 AM
 
ठाणे- डबघाईला आलेल्या ठाणे
परिवहन सेवेच्या (टीएमटी)
भ्रष्ट वाहतूक अधिका-यासह
तब्बल 63 कर्मचा-यांच्या
बडतर्फीवर सोमवारी आयुक्त आर.
ए. राजीव यांनी शिक्कामोर्तब
केले. तसेच इतर दोन भ्रष्ट
अधिका-यांची पदावनती करून
त्यांना आयुक्तांनी सूचक
इशारा देत टीएमटीचा रुतलेला
गाडा रुळावर आणण्याच्या
कामाची नांदी केली आहे.
टीएमटी सेवेच्या कामात दांडय़ा
मारणा-या कर्मचा-यांनी 48 तासांत
हजर व्हावे; अन्यथा
त्यांच्यावर कारवाई करण्यात
येईल, असा इशारा आयुक्त राजीव
यांनी काही दिवसांपूर्वी
परिवहन संदर्भात बोलावलेल्या
विशेष सभेत दिला होता. या
कर्मचा-यांना 31 ऑगस्टपर्यंतची
कामावर हजर राहाण्याची मुदत
देण्यात आली असतानाही गैरहजर
असणा-या 141 कर्मचा-यांपैकी केवळ
27 कर्मचारीच हजर झाले होते.
अखेर सोमवारी आयुक्तांनी
दीर्घकालीन रजेवर असणा-या 62
कर्मचा-यांना आणि वाहतूक
अधीक्षक गुरुनाथ पेडणेकर
यांना बडतर्फ केले. बडतर्फ
करण्यात आलेल्या
कर्मचा-यांमध्ये वाहक, चालक
आणि मॅकेनिक यांचा समावेश आहे.
दरम्यान, टीएमटीचे कार्मिक
अधिकारी अजित निराळी आणि
दामोदर नानकर यांची पदावनती
करण्यात आली आहे.