कोलाज

नुकत्याच सुरू झालेल्या ‘सत्यमेव जयते’ या कार्यक्रमाने स्त्री-भ्रूणहत्या हा विषय पहिल्याच भागात समोर आणल्यावर भारतातल्या सामाजिक समस्या आणि आमीर खानची ‘शो’बाजी अशा दोन्ही विषयांवर एकाच वेळी चर्चा सुरू झाली आहे. ज्याच्याकडे आजही मोठय़ा आदराने पाहिले जाते, तो वैद्यकीय व्यवसाय या आधी कधीही एवढय़ा खालच्या पातळीवर पोहचला नव्हता. आपल्याकडे येणाऱ्या प्रत्येक रुग्णाला बरे करण्याऐवजी त्याचा जास्तीत जास्त खिसा कसा कापता येईल, याचाच हल्लीची डॉक्टर मंडळी विचार करतात. डॉक्टरी भाषेत ‘कट प्रॅक्टिस’ म्हणवल्या जाणा-या या देवघेवीने वैद्यकीय व्यवसाय पोखरून टाकला आहे. एका बाजूला भारतीय वेगवेगळ्या आजारांचे बळी ठरत असताना, वैद्यकीय व्यवसायाची ही ढासळती नीतिमत्ता अधिकच चिंताजनक वाटते. त्यावर इलाज होत नाही तोवर भारतीयांना सार्वजनिक आरोग्यसेवेचा हक्क मिळणे अवघड आहे.