भारतीय क्रिकेट संघाचा कर्णधार महेंद्रसिंग धोनी याने 2015च्या वर्ल्डकपमध्ये खेळण्यासाठी तयारी करण्यासाठी पुढील वर्षी कसोटी क्रिकेटमधून निवृत्ती घेण्याचे संकेत दिले आहेत.

पर्थ- ऑस्ट्रेलिया-न्यूझीलंडमध्ये 2015  मध्ये होणा-या वर्ल्डकपमध्ये खेळायचे असल्यास 2013 पर्यंत कसोटीतून निवृत्ती स्वीकारण्याचे संकेत भारताचा कर्णधार महेंद्रसिंग ढोणीने दिले आहेत.

‘‘2015 च्या वर्ल्डकपमध्ये जर मी खेळणार असेन तर क्रिकेटच्या एका प्रकारातून निवृत्ती घेईन. मात्र 2013 पर्यंत तीनही प्रकाराच्या क्रिकेटमध्ये खेळण्याची इच्छा आहे,’’ असे ढोणीने सांगितले. ‘‘माझा हा निर्णय फक्त वैयक्तिक नसून देशाचा विचार करून घेणार आहे. फॉर्म हा महत्वाचा भाग असून जर 2014 पर्यंत मी फिट नसेन तर वर्ल्डकप एका वर्षानेच दूर राहतो. या परिस्थितीत वर्ल्डकपसारख्या स्पर्धेत अनुभवी यष्टिरक्षक असणे गरजेचे आहे. ते पाहता मला योग्य तो निर्णय वेळीच घ्यावा लागेल,’’ असे ढोणीने सांगितले.

भारतीय संघात दुफळी नाही

‘‘भारतीय संघाच्या ड्रेसिंगरुममधील वातावरणाचा मला अभिमान असून संघात कोणतेही वाद नाहीत. आतापर्यंत भारतीय संघात दुफळी झाल्याचे मी पाहिले नाही. संघातील प्रत्येक जण यशापयशात एकमेकांची साथ देतो,’’ असे ढोणीने ऑस्ट्रेलियन मीडियाच्या टीकेवर सांगितले.

मालिकेत यशस्वी पुनरागमन हवे आहे

‘‘मालिकेत यशस्वी पुनरागमन करायचे आहे. इंग्लंड दौ-यातून मोठा धडा घेतला असून येथेही खूप काही शिकलो आहोत. नियोजनाप्रमाणे खेळ केल्यास विजय दूर नाही,’’ असे ढोणीने स्पष्ट केले.

Marathi Online News