श्रीलंकेच्या क्रिकेट संघाचा कर्णधार आणि तडाखेबाज फलंदाज तिलकरत्ने दिलशान याने सोमवारी कर्णधारपदाचा राजीनामा दिला.

कोलंबो- श्रीलंकेच्या क्रिकेट संघाचा कर्णधार आणि तडाखेबाज फलंदाज तिलकरत्ने दिलशान याने सोमवारी  कर्णधारपदाचा राजीनामा दिला. माहेला जयवर्धनेच्या नावाची कर्णधारपदासाठी चर्चा असून लवकरच तशी घोषणा श्रीलंकन क्रिकेट बोर्डाकडून होणार असल्याचे सूत्रांनी सांगितले.

दक्षिण आफ्रिकेविरुद्धच्या एकदिवसीय मालिकेत 3-2 असा पराभव झाल्यानंतर त्याने पदावरुन पायउतार होण्याचा निर्णय घेतला. त्याने आपला राजीनामा क्रिकेट बोर्डाकडे पाठवला आहे. त्याचा हा निर्णय अपेक्षितच होता असे मत बोर्डाच्या सदस्यांनी  व्यक्त करत तो देशासाठी खेळेल असा विश्वासही त्यांनी व्यक्त केला आहे.

विश्वचषक क्रिकेट स्पर्धेच्या  अंतिम फेरीत भारताकडून पराभव स्वीकारावा लागल्यानंतर श्रीलंकेच्या कर्णधारपदावरून कुमार संगकाराने राजीनामा दिला होता. त्यावेळी कर्णधारपदाची धुरा तिलकरत्ने दिलशानकडे सोपावण्यात आली होती. त्याच्या नेतृत्वाखाली श्रीलंकेने इंग्लंड, दक्षिण आफ्रिकेचा दौरा केला होता.  तडाखेबाज फलंदाज असलेल्या दिलशानला कर्णधारपदाची धुरा सोपवण्यात आल्यानंतर आपला फॉर्म कायम ठेवता आला नाही.

दिलशानच्या नेतृत्वाखाली श्रीलंकेला डर्बन येथे दक्षिण आफ्रिकेमध्ये पहिल्यांदा विजय मिळवण्यात यश आले.

Marathi Online News