चार दिवसांपूर्वी ठाण्यातही घडली होती अशीच घटना
नवी दिल्ली : राजधानी दिल्ली जवळील ग्रेटर नोएडा (Greater Noida) येथे शुक्रवारी सकाळी मोठी दुर्घटना घडली. आम्रपाली ग्रुपकडून येथे निर्माण होत असलेल्या एका बिल्डींगमधील लिफ्ट कोसळून (Lift collapsed) अपघात झाला. अपघातात चार जणांचा जागीच मृत्यू झाला असून पाच जण जखमी झाले आहेत. लिफ्टमधील मृतांचे शव बाहेर काढण्यात आले असून शवविच्छेदनासाठी पाठवण्यात आले आहे तर जखमींना रुग्णालयात दाखल करण्यात आले आहे.
बिसरख पोलीस ठाणे हद्दीतील ड्रीम व्हॅली परिसरात ही इमारत उभारली जात आहे. दुर्घटना घडली त्यावेळी लिफ्टमध्ये बांधकामासाठीचे साहित्य आणि कामगार होते. लिफ्ट दुर्घटनेची माहिती मिळताच स्थानिक पोलीस व प्रशासनाने घटनास्थळी धाव घेतली. याप्रकरणी, पोलिसांकडून अधिक तपास सुरू आहे. मिळालेल्या माहितीनुसार, सर्व मृत कामगार हे बिहारच्या किशनपूरच्या टभका गावात राहणारे होते.
ठाणे जिल्ह्यातही चार दिवसांपूर्वी सोमवारी लिफ्ट दुर्घटनेत ७ जणांना आपला जीव गमवावा लागला होता. ठाण्याच्या बाळकुम परिसरात असलेल्या रुणवाल आयरीन या ४० मजली इमारतीवरून लिफ्ट कोसळली होती. नुकतंच बांधकाम पूर्ण झालेल्या या इमारतीच्या छतावर वॉटरप्रुफिंगचे काम सुरू होतं. वॉटरप्रुफिंगचं हे काम संपवून कामगार खाली येत असताना अपघात घडला होता. त्यानंतर पुन्हा एकदा नोएडात लिफ्ट दुर्घटनेमुळे कामगारांना आपला जीव गमवावा लागल्याने कामगारांच्या सुरक्षेचा प्रश्न ऐरणीवर आला आहे.