खोपोली : पाली-खोपोली मार्गावर आज पहाटे अज्ञात वाहनाने रिक्षाला जोरदार धडक दिल्याने भीषण अपघात (Khopoli Accident) झाला. यात रिक्षामधील दोन जणांचा जागीच मृत्यू झाला. तर एक जण गंभीर जखमी झाला आहे.
पाली-खोपोली मार्गावरून कंपनीतून रात्रपाळी करून कामावरून घरी रिक्षा क्रमांक (MH 14 J 4840) ही चालक महेश खरात (रा. कळंब, ता. सुधागड) हे घेऊन जात असताना ते दुरशेत जवळ आले असता अज्ञात वाहनाने तिला जोरदार धडक दिल्याने भीषण अपघात झाला. या अपघातात रिक्षामधील रामदास ज्ञानेश्वर घोगरकर आणि अजित हरिश्चन्द्र वाघमारे (रा, घोडपापड जांभूळपाडा) या दोन जणांचा जागीच मृत्यू झाला. तर रिक्षा चालक महेश खरात हा गंभीर जखमी असल्याने त्याला तात्काळ एमजीएम रुग्णालयात दाखल करण्यात आले आहे.
याप्रकरणी पुढील तपास खालापूर पोलीस करीत आहेत. अजित वाघमारे यांची दोन लहान मुले आहेत तर रामदास घोगरकर हा एकुलता एक मुलगा असल्याने नातेवाईकांनी तपासाची मागणी केली आहे.
या मार्गावर विशेष म्हणजे अॅम्ब्युलन्स उपलब्ध नसल्याने खोपोली वरून अॅम्ब्युलन्स सेवा उपलब्ध होते. महाराष्ट्र शासनाच्या आरोग्य विभागाच्या १०८ ॲम्बुलन्स मधून जखमी ड्रायव्हरला पुढील उपचारासाठी एमजीएम रुग्णालय पनवेल येथे पाठवले गेले.
दुर्दैवाने या मार्गावर अॅम्ब्युलन्स सेवा तत्काळ उपलब्ध होत नसल्याने वेळेत उपचार भेटत नाहीत, ही शोकांतिका आहे.