स्वारगेट एसटी डेपोमध्ये शिवशाही बसमध्ये बलात्कार झाल्याची तक्रार पीडित तरुणीने पोलिसांकडे केली आहे. या प्रकरणी सीसीटीव्ही फूटेजच्या मदतीने पोलिसांनी आरोपीचा चेहरा ओळखला आहे. पण घटनास्थळावरुन पसार झालेला आरोपी दत्तात्रय गाडे अद्याप पोलिसांच्या हाती आलेला नाही. या पार्श्वभूमीवर पुणे पोलिसांनी आरोपीची माहिती देणाऱ्यास एक लाख रुपयांचे पारितोषिक जाहीर केले आहे. पुणे पोलिसांनी आरोपीचा फोटो प्रसिद्ध केला आहे. पाठोपाठ आरोपीच्या गुन्हेगारी पार्श्वभूमीची माहिती आणि त्याच्या विषयीची इतर महिती पण मिळवली आहे.
आरोपी दत्तात्रय गाडे हा एक सराईत गुन्हेगार आहे. चोऱ्या करणे, लिफ्ट देण्याच्या बहाण्याने महिलांना वाहनात बसवणे आणि निर्मनुष्य ठिकाणी चाकूचा धाक दाखवून लुबाडणे, दरोडा असे वेगवेगळे गुन्हे केलेल्या दत्तात्रय गाडे विरोधात शिक्रापूर येथे दोन तसेच अहिल्यानगर जिल्ह्यातील सुपा, केडगाव आणि कोतवाली पोलिस ठाण्यांत गुन्हे दाखल आहेत. काही गुन्ह्यांतील त्याच्या विरोधातले खटले प्रलंबित आहेत. याआधी त्याला एका दरोड्याप्रकरणी शिक्षा झाली होती.
स्वारगेट एसटी डेपोमध्ये नेमके काय घडले ?
स्वारगेट एसटी डेपोमध्ये एका कोपऱ्यात उभ्या असलेल्या आणि सर्व दिवे बंद असलेल्या रिकाम्या शिवशाही बसमध्ये बलात्काराची घटना घडली. एका तरुणीला दिशाभूल करणारी माहिती देऊन बसमध्ये पाठवण्यात आले. ही तरुणी बसमध्ये शिरताच वेगाने आरोपी बसमध्ये आला, त्याने बसचा दरवाजा आतून बंद केला आणि तरुणीवर बलात्कार केला. आरोपीने पीडितेवर दोनदा अत्याचार केला. पहाटे साडेपाच वाजता ही घटना घडली. कायम गर्दी असलेल्या स्वारगेट एसटी डेपोमध्ये ही घटना घडली त्यावेळी कोणाच्याही लक्षात आले नाही. घटनेनंतर आधी आरोपी बसमधून उतरला आणि वेगाने पसार झाला. थोड्या वेळाने पीडित तरुणी खाली आली आणि दुसऱ्या बसमधून पुढच्या प्रवासाला रवाना झाली. प्रवासादरम्यान पीडितेने एका मित्राला फोन करुन घटनेची माहिती दिली. या मित्राने दिलेला सल्ला पटला म्हणून तरुणी हडपसर जवळ बसमधून उतरली आणि दुसऱ्या वाहनाने पुन्हा स्वारगेट येथे आली. स्वारगेट पोलिसांकडे तरुणीने बलात्कार प्रकरणी तक्रार दिली. यानंतर पोलिसांनी तरुणीला वैद्यकीय तपासणीसाठी सरकारी रुग्णालयात नेले.
आतापर्यंतची पोलीस कारवाई
माहिती, फोटो आणि सीसीटीव्ही फूटेज हाती येताच पोलिसांनी १३ पथके तयार केली. पुण्यातून बाहेर जाणाऱ्या सर्व मार्गांवर तपासणी सुरू करण्यात आली. रेल्वे स्टेशन, बस स्टँड याठिकाणी आरोपीचा शोध सुरू झाला. आरोपी ज्या ठिकाणी लपण्याची शक्यता आहे, अशा सर्व संभाव्य ठिकाणी शोध सुरू आहे.