मुंबई : चाकरमान्यांसाठी आनंदवार्ता समोर आली आहे. (Maharashtra ST Bus) मागील अडीच महिन्यांपासून एसटी वाहतुकीसाठी बंद असलेले मुंबई सेंट्रल एसटी स्थानक पुन्हा सुरू होणार आहे. आता वाहतूक पूर्ववत होण्याचा होण्याचा मार्ग मोकळा झाला आहे. (Mumbai Central Bus Depot) या स्थानकाचे काँक्रीटीकरणाचे काम पूर्ण झाले आहे. येत्या १७ मार्च पासून येथून एसटी गाड्या पुन्हा धावणार आहेत. सध्या मुंबई सेंट्रलहून सुटणाऱ्या एसटी गाड्या कुर्ला नेहरूनगर, दादर, परळ आणि पनवेल स्थानकातून धावत आहेत.
मिळालेल्या माहितीनुसार, महाराष्ट्र औद्योगिक विकास महामंडळाच्या (एमआयडीसी) निधीतून स्थानकाच्या काँक्रीटीकरणाचा हा खर्च होत आहे. मुंबई सेंट्रल स्थानक आगारातील काँक्रीटीकरणाचे काम २३ डिसेंबर २०२४ पासून सुरू झाले होते. ते १३ मार्च रोजी पूर्ण झाले. काँक्रीटीकरणामुळे मुंबई सेंट्रल येथे पूर्ण होणाऱ्या फेऱ्या अन्य स्थानकांत वळवण्यात आल्या होत्या. आगार आणि बस स्थानक परिसरात क्राँकीटीकरणाचे काम सुरू असल्याने सेंट्रल येथून प्रवास सुरू करणाऱ्या प्रवाशांना परळ, दादर, कुर्ला नेहरूनगर स्थानकात जावे लागत होते. हा प्रवास त्रासदायक ठरत असल्याची अनेक प्रवाशांची तक्रार होती. आता मात्र प्रवाशांना दिलासा मिळणार आहे.