हापूर (उत्तर प्रदेश) : राज्यात लोकसंख्या नियंत्रणाबाबत विविध मोहिमा राबवल्या जात असताना, उत्तर प्रदेशातील हापूर जिल्ह्यात एका ५० वर्षीय महिलेने तिच्या १४ व्या बाळाला जन्म दिला आहे. विशेष म्हणजे, ही प्रसूती रुग्णालयात पोहोचण्यापूर्वी, रुग्णवाहिकेतच झाली. या घटनेची संपूर्ण परिसरात मोठ्या प्रमाणात चर्चा सुरू आहे.
हापूरच्या पिलखुवा कोतवाली भागातील बजरंगपुरी मोहल्ल्यात राहणाऱ्या इमामुद्दीन यांच्या पत्नी गुडिया यांनी या बाळाला जन्म दिला आहे. कुटुंबियांनी सांगितले की, आई आणि बाळ दोघेही पूर्णपणे निरोगी आहेत.
रुग्णवाहिकेतच प्रसूती
गुरुवारी गुडियाला प्रसूती वेदना सुरू झाल्यानंतर तिला पिलखुवा येथील सरकारी सीएचसी रुग्णालयात नेण्यात आले. मात्र, प्रकृती गंभीर असल्यामुळे तिला हापूर जिल्हा रुग्णालयात रेफर करण्यात आले. जिल्हा रुग्णालयात पोहोचण्याच्या आधीच, रुग्णालयाच्या गेटवर रुग्णवाहिकेतच तिने एका मुलीला जन्म दिला. त्यानंतर, आरोग्य कर्मचारी आणि डॉक्टरांनी तिला स्ट्रेचरवर रुग्णालयात हलवले. दुसऱ्या दिवशी, आई आणि बाळाला डॉक्टरांनी डिस्चार्ज दिला.
कुटुंबाची परिस्थिती आणि वादग्रस्त चर्चा
गुडियाचा मोठा मुलगा २२ वर्षांचा आहे, तर सर्वात धाकटा मुलगा ३ वर्षांचा आहे. विशेष म्हणजे, या कुटुंबात ११ भावंडे असून, तीन मुलांचा आधीच मृत्यू झाला आहे. मात्र, या घटनेनंतर कुटुंबीयांनी १४ नव्हे, १२ मुले असल्याचा दावा केला आहे.
गुडियाचा पती इमामुद्दीन मजुरीचे काम करतो, तर मोठा मुलगा साहिल वेल्डिंगचे काम करतो. कुटुंबाची आर्थिक परिस्थिती अत्यंत हलाखीची आहे. वाढत्या महागाईच्या पार्श्वभूमीवर, मोठ्या कुटुंबामुळे मुलांच्या शिक्षण आणि आरोग्याकडे लक्ष देणे कठीण होत असल्याचे सामाजिक कार्यकर्त्यांनी सांगितले.
सोशल मीडियावर चर्चेचा विषय
ही घटना समोर आल्यानंतर सोशल मीडियावर मोठी चर्चा रंगली आहे. लोकसंख्या नियंत्रणाच्या मोहिमा सुरू असतानाही अशा घटना घडत असल्याने, प्रशासन आणि समाजातील अनेक घटक यावर चिंता व्यक्त करत आहेत.