चेपॉक: चेन्नईच्या चेपॉक मैदानावर आज कोलकाता नाईट रायडर्सने चेन्नईला ८ विकेटनी हरवले. चेन्नईने कोलकत्त्यासमोर विजयासाठी १०४ धावांचे माफक आव्हान ठेवले होते. कोलकत्त्याने हे आव्हान केवळ १० षटके तसेच ८ विकेट राखत पूर्ण केले.
सामन्यात चेन्नईने पहिल्यांदा फलंदाजीचा निर्णय घेतला होता. मात्र कोलकत्त्याच्या गोलंदाजांसमोर चेन्नईने साफ गुडघे टेकले. चेन्नईने टॉस जिंकला आणि फलंदाजीचा निर्णय घेतला खरा मात्र हा निर्णय त्यांना चांगलाच महागात पडला. कोलकात्ताच्या जबरदस्त माऱ्यासमोर चेन्नईला केवळ १०३ धावाच करता आल्या. आयपीएलच्या इतिहासातील चेन्नईचीही चेपॉकच्या मैदानावरील सर्वात कमी धावसंख्या आहे.
कोलकत्ताच्या गोलंदाजांनी भेदक मारा करताना चेन्नईच्या खेळाडूंना खेळपट्टीवर टिकूच दिले नाही. रचिन रवींद्रने ४, राहुल त्रिपाठीने १६, डेवॉन कॉन्वेने १२, विजय शंकरने २९ धावा करत धावसंख्या वाढवण्याचा प्रयत्न केला. मात्र इतर फलंदाज साफ अपयशी ठरले. आर. अश्विन १, रवींद्र जडेजा ०, एमएस धोनी १, नूर अहमद १ अशा धावा केल्या.
कोलकत्त्याकडून सुनील नरेनने सर्वाधिक ४४ धावा केल्या. तर सलामीवीर क्विंटन डी कॉकने २३ धावा केल्या. कर्णधार अजिंक्य रहाणे २० वर तर रिंकू सिंह १५ धावांवर नाबाद राहिले.