चेन्नई : पंजाब किंग्सचा फिरकीपटू आणि आयपीएल इतिहासातील सर्वाधिक विकेट घेणारा गोलंदाज युजवेंद्र चहलने इतिहास घडवला आहे.चहलने २०२५ च्या आयपीएलच्या ४९व्या सामन्यात चेन्नई सुपर किंग्स विरुद्ध गोलंदाजी करताना हॅटट्रिक केली आहे. याचसोबत चहल हा आयपीएल २०२५ मध्ये हॅटट्रिक घेणारा पहिला गोलंदाजही ठरला. याशिवाय २०२३ पासून आयपीएलमध्ये हॅटट्रिक घेणारा तो पहिला गोलंदाज आहे.
१९ व्या षटकात अद्भुत पराक्रम
बुधवारी, ३० एप्रिलला चेपॉक स्टेडियमवर खेळवल्या जात असलेल्या सामन्यात, चहलने प्रथम गोलंदाजी करणाऱ्या पंजाब किंग्जसाठी १९ व्या षटकात हा अद्भुत पराक्रम केला. या षटकात भारतीय लेग-स्पिनरने ४ विकेट्स घेतल्या, ज्यामध्ये एमएस धोनीचा एक आणि हॅट्रिकचा समावेश होता. चहलने १९ व्या षटकाची सुरूवात वाईड बॉलने केली. मग धोनीने पहिल्या लीगल चेंडूवर षटकार मारला. पण इथून चहलने सामन्याचा रोख बदलला आणि स्वत:च्या नावे विक्रमही केला आहे. चहलने यानंतर दुसऱ्या चेंडूवर धोनीला आपल्या फिरकीच्या जाळ्यात अडकवत झेलबाद केलं. त्यानंतर दीपक हुडाने तिसऱ्या चेंडूवर दोन धावा घेतल्या.
सलग तीन चेंडूवर हॅटट्रिक
चहलने यानंतर सलग तीन चेंडूवर हॅटट्रिक घेतली. चौथ्या चेंडूवर मोठा फटका खेळण्याच्या प्रयत्नात दीपक हुडा प्रियांश आर्यकरवी झेलबाद झाला. पाचव्या चेंडूवर चहलने अंशुल कंबोजला क्लीन बोल्ड केलं. तर अखेरच्या चेंडूवर नूर अहमद मोठा फटका खेळायला गेला आणि यान्सनने त्याला झेलबाद केलं.आणि आयपीएल २०२५ मध्ये हॅटट्रिक घेणारा तो पहिला गोलंदाज ठरला. हॅटट्रिक घेताच चहलने त्याची आयकॉनिक पोज देत मैदानात बसला आणि अशारितीने चेन्नईचा डाव १९० धावांवर आटोपण्यात मोठी भूमिका बजावली.