महाराष्ट्राला पावसाचा दणका, लोकल १० ते २० मिनिटे उशिराने

मुंबई : यंदा मान्सूनचं देशात लवकर आगमन झालंय. महाराष्ट्रात ऐन मे महिन्यात मुसळधार पाऊस पडत आहे. ढगांच्या गडगडाटासह विजांचा कडकडाट सुरू आहे. पावसाच्या दमदार आगमन झाल्याची वर्दी मुंबईच्या उपनगरीय रेल्वेनेही दिली आहे. लोकल दहा ते वीस मिनिटे उशिराने धावत आहेत. राज्यात पुढील तीन ते चार तास पावसाचा जोर असेल असा हवामान खात्याचा अंदाज आहे. पहाटेपासून पाऊस सुरू असल्यामुळे मध्य रेल्वे मुख्य मार्गावर गाड्या दहा ते वीस मिनिटे विलंबाने धावत आहेत. रेल्वे ट्रॅकवर पाणी साचण्यास सुरुवात झाली आहे. कर्जत, खोपोली, बदलापूरवरुन मुंबईकडे येणाऱ्या लोकल विलंबाने धावत आहे.तसेच मुंबईहून कल्याण, कर्जतच्या दिशेने जाणाऱ्या गाड्याही विलंबाने धावत आहेत. मुंबईच्या आसापसच्या शहरांमध्ये अनेक ठिकाणी विजेचा लपंडाव सुरू आहे. पावसाचा जोर वाढताच वीज खंडीत केली जात आहे. काही ठिकाणी वारे ताशी ५० ते ६० किमी वेगाने वाहत आहेत. मुंबईसह उपनगर, ठाणे आणि पालघर जिल्ह्यात यलो अलर्ट देण्यात आलाय. रायगड, रत्नागिरी आणि सिंधुदुर्ग जिल्ह्यांना ऑरेंज अलर्ट देण्यात आलाय.