मुंबई: मुंबईत कालपासून नैऋत्य मान्सूनचे जोरदार आगमन झाले, आणि या पहिल्याच पावसाने मुंबई शहराला अक्षरशः झोडपून काढले. मुंबईत झालेल्या मुसळधार पावसामुळे शहरातील ठिकठिकाणी पाणी साचण्यासोबत झाड कोसळण्याच्या घटना समोर येत आहेत. दरम्यान, विक्रोळीतील कन्नमवार नगरमध्ये अशाच एका झाड कोसळण्याची घटना घडली आहे, ज्यामध्ये २६ वर्षीय तरुणाचा दुर्दैवी मृत्यू झाला आहे. तेजस नायडू असं या तरुणाचं नाव असून, तो आपल्या दोन मित्रांसोबत गणेश मैदानाजवळ पावसापासून आश्रय घेण्यासाठी झाडाखाली थांबला होता.
अंगावर झाड कोसळल्याने मृत्यू
मिळालेल्या माहितीनुसार, सोमवारी सकाळपासून मुंबई आणि उपनगरांमध्ये जोरदार पाऊस कोसळत होता. विक्रोळीतील कन्नमवार नगर येथील गणेश मैदानाजवळ तीन तरुण झाडाखाली उभे होते. पाऊसाबरोबरच वारे देखील प्रचंड वाहत होते, याचवेळी अचानक एक मोठं जंगली झाड त्यांच्या अंगावर कोसळलं. झाड थेट तेजस नायडूच्या डोक्यात आदळलं, तर इतर दोन तरुण थोडक्यात बचावले गेले.
घटनेनंतर परिसरात एकच खळबळ उडाली. तेजसच्या मित्रांनी आरडाओरड करून स्थानिक नागरिकांना मदतीसाठी बोलावलं. घटनेची माहिती मिळताच पोलीस आणि अग्निशमन दलाने घटनास्थळी धाव घेतली. झाड हटवून तिघांना बाहेर काढण्यात आलं. त्यानंतर तेजसला गोदरेज रुग्णालयात दाखल करण्यात आलं, पण तिथे त्याला मृत घोषित केले गेले..