पिंपरी-चिंचवड : पुण्यातील वैष्णवी हगवणे हुंडाबळी प्रकरणातील फरार आरोपी निलेश चव्हाणला अखेर नेपाळमधून अटक करण्यात आली आहे. गेल्या अनेक दिवसांपासून पोलिसांना गुंगारा देणा-या निलेश चव्हाणच्या मुसक्या आवळण्यात पिंपरी-चिंचवड पोलिसांना यश आलं आहे.
वैष्णवीच्या आत्महत्येनंतर तिच्या कुटुंबीयांवर दबाव टाकणं, धमकावणं, आणि गुन्हेगारी कृत्यांमध्ये सहभाग असल्याच्या गंभीर आरोपाखाली निलेश चव्हाण फरार झाला होता. या प्रकरणामुळे संपूर्ण शहरात संतापाची लाट उसळली होती.
पिंपरी-चिंचवड पोलिसांनी या प्रकरणी विशेष लक्ष केंद्रित करत, एक-दोन नव्हे तर तब्बल ६ शोध पथकं तयार केली होती. सुरुवातीला चव्हाण दुसऱ्या राज्यात लपल्याचा संशय होता, पण गोपनीय माहितीच्या आधारे तो नेपाळमध्ये असल्याचं स्पष्ट झालं आणि पोलिसांनी तातडीने कारवाई करत त्याला अटक केली.
लवकरच निलेश चव्हाणला भारतात आणून न्यायालयासमोर हजर केलं जाणार आहे. पोलीस सूत्रांनी दिलेल्या माहितीनुसार, त्याच्याकडून आणखी अनेक महत्त्वाच्या बाबतीत माहिती मिळण्याची शक्यता असून, चौकशीत धक्कादायक खुलासे होण्याची शक्यता आहे.
हा गुन्हा केवळ आत्महत्येपुरता मर्यादित नसून, त्यामागे दबाव, छळ आणि गुन्हेगारी साखळी असल्याचा संशय आहे, त्यामुळे पुढील तपास अधिक गंभीर आणि व्यापक होण्याची शक्यता वर्तवली जात आहे.