पुणे: पुण्यातील वैष्णवी हगवणे आत्महत्या प्रकरण आता चांगलेच चर्चेत आले आहे. सासरच्या जाचाला कंटाळून वैष्णवीने आपल्या राहत्या घरी दिनांक 16 मे रोजी गळफास घेऊन आत्महत्या केल्याचा रोप आहे. मात्र ही आत्महत्या नसून वैष्णवीची हत्या केल्याचा आरोप तिच्या माहेरच्यांनी हगवणे कुटुंबीयांविरुद्ध केला आहे. या प्रकरणात वैष्णवीचा पती, दीर, सासू, सासरे आणि नणंद यांना अटक केली आहे. मात्र वैष्णवीच्या मृत्यूनंतर तिच्या बाळाचं संगोपन कोण करणार? असा प्रश्न होता, याबाबत मोठी अपडेट समोर आली आहे.
मंत्री आदिती तटकरे यांनी ट्विट करत दिली माहिती
वैष्णवी हगवणेच्या मृत्यूनंतर तिच्या 9 महिन्याच्या बाळाची कस्टडी वैष्णवीचे आईवडील (कस्पटे कुटुंबीय) यांनी मागितली होती. मात्र यावर हगवणेकडून आक्षेप घेण्यात आला होता. किंबहुना वैष्णवीच्या मृत्यूनंतर तिचे बाळ काही दिवस नीलेश चव्हाण याकडे होते, जे नंतर नाट्यमय पद्धतीने कस्पटे यांकडे सुपूर्द करण्यात आले होते. मात्र या बाळाच्या अधिकृत कस्टडीबाबत अद्याप कोणताही निर्णय झाला नव्हता. मात्र आता, वैष्णवी हगवणेचा मुलगा जनक हगवणे याचा सांभाळ करण्यासाठी बाल कल्याण समितीने त्याची आजी व वैष्णवी हगवणे यांच्या आई स्वाती कस्पटे यांना योग्य व्यक्ती म्हणून नियुक्त केलं आहे. याबाबत मंत्री आदिती तटकरे यांनी ट्विट करत माहिती दिली आहे.
वैष्णवी हगवणेच्या मृत्यूपश्चात तिचा 9 महिन्यांचा मुलगा जनक हगवणे याचा सांभाळ करण्यासाठी बाल कल्याण समितीने आजी व वैष्णवी हगवणेची आई स्वाती कस्पटे यांना योग्य व्यक्ती म्हणून नियुक्त केले आहे. याबाबत जिल्हा बाल संरक्षण अधिकाऱ्यांनी सादर केलेल्या सामाजिक तपासणी अहवालानुसार, श्रीमती स्वाती कस्पटे याच योग्य व्यक्ती असून त्यांचे सामाजिक, भावनिक व कौटुंबिक वातावरण बालकाच्या हितासाठी अनुकूल आहे.
यापुढे स्व. वैष्णवी हगवणे यांचा मुलगा कु. जनक हगवणे यांचा कायदेशीर ताबा श्रीमती स्वाती कस्पटे यांच्याकडे असेल. बालकाच्या शिक्षणाची, आरोग्याची व सर्वांगीण विकासाची संपूर्ण जबाबदारी श्रीमती स्वाती कस्पटे यांची असेल.’ असं ट्विट आदिती तटकरे यांनी केलं आहे.