IPL 2025 Qualifier 2 MI vs PBKS: चॅम्पियन्स ट्रॉफी जिंकली की मुंबई इंडियन्सचे आयपीएल जेतेपद ठरलेले? रोहित शर्माचा ‘लकी योगायोग’ पुन्हा चर्चेत!
नवी दिल्ली : मुंबई इंडियन्सच्या चाहत्यांसाठी सामना सुरु होण्यापूर्वीच एक जबरदस्त बातमी समोर आली आहे. पंजाबविरुद्धच्या ‘क्वालिफायर २’ सामन्याआधी रोहित शर्माशी जोडलेला एक भन्नाट योगायोग पुन्हा एकदा चर्चेत आला आहे, जो चाहत्यांच्या आशा पुन्हा पल्लवित करत आहे.
गमतीशीर बाब म्हणजे रोहित शर्मा यंदा मुंबई इंडियन्सचा कर्णधार नसतानाही, त्यांच्या उपस्थितीत एक असा इतिहास पुन्हा उलगडतोय, जो मुंबईसाठी ‘लकी चार्म’ ठरत आला आहे. रोहितच्या नेतृत्वात भारताने नुकतीच २०२५ ची चॅम्पियन्स ट्रॉफी जिंकली. आणि ज्या-ज्या वर्षी भारताने ही ट्रॉफी जिंकली, त्या-त्या वर्षी रोहित शर्माने आयपीएल ट्रॉफीवरही आपलं नाव कोरलंय, हे आता संपूर्ण सोशल मीडियावर ट्रेंड होऊ लागलं आहे.
२००९ मध्ये डेक्कन चार्जर्सकडून रोहितने आयपीएल जिंकले, त्याच वर्षी चॅम्पियन्स ट्रॉफी झाली. २०१३ मध्ये भारताने धोनीच्या नेतृत्वाखाली चॅम्पियन्स ट्रॉफी उचलली आणि रोहितने मुंबईसाठी पहिले आयपीएल जेतेपद मिळवलं. २०१७ ला भारत फायनलमध्ये हरला, पण मुंबई मात्र विजयी झाली. आणि आता २०२५ – रोहितने भारतासाठी ट्रॉफी जिंकली आहे... म्हणजेच?
‘रोहित + चॅम्पियन्स ट्रॉफी = मुंबईची आयपीएल ट्रॉफी’ हे समीकरण पुन्हा एकदा जुळणार का? सामना सुरू होण्याआधीच हे योगायोग पाहून मुंबई इंडियन्सच्या चाहत्यांमध्ये उत्साहाचं आणि अपेक्षांचं वातावरण आहे.
कधी कधी आकडे, इतिहास आणि योगायोगदेखील सामना जिंकवू शकतात... आणि यंदा तर रोहितच्या नशिबाची हवा मुंबईच्या दिशेने वाहतेय. यामुळे रोहित शर्माचा हा योगायोग मुंबई इंडियन्सच्या चाहत्यांना नक्कीच सुखावणारा असेल. त्यामुळे हा योगायोग पुन्हा यावर्षी पाहायला मिळणार की नाही, याकडे तमाम क्रिकेट चाहत्यांचे लक्ष लागले आहे.