भारताला पहिले तेजस एमके-१ए जूनमध्येच मिळणार

नाशिक : भारतीय हवाई दलाला पहिले स्वदेशी तेजस एमके-१ए लढाऊ विमान जून २०२५ मध्येच मिळणार आहे. नाशिक जिल्ह्यात हिंदुस्तान एअरोनॉटिक्स लिमिटेड कंपनी दर वर्षी २४ या गतीने तेजस एमके-१ए लढाऊ विमानांची निर्मिती करणार आहे. पहिले स्वदेशी तेजस एमके-१ए लढाऊ विमान जून अखेरपर्यंत भारतीय हवाई दलाला मिळेल. भारतीय हवाई दलाने ८३ तेजस एमके-१ए लढाऊ विमानांसाठी हिंदुस्तान एअरोनॉटिक्स लिमिटेड कंपनीशी ४८ हजार कोटी रुपयांचा करार केला आहे.

तेजस एमके-१ए हे हलक्या वजनाचे अत्याधुनिक लढाऊ विमान आहे. आकाशातून आकाशात, आकाशातून जमिनीवर तसेच पाण्यावर आणि खोल पाण्यात हल्ले करण्यासाठी तेजस एमके-१ए लढाऊ विमान सक्षम आहे. शत्रूच्या विमानांशी आकाशात लढण्याची वेळ आल्यास तेजस एमके-१ए हे प्रभावी कामगिरी करण्यास सक्षम आहे.

भारताच्या तेजस एमके-१ए लढाऊ विमानात अमेरिकेच्या जीई कंपनीचे इंजिन आहे. या इंजिनांचा भारताला होणार असलेला पुरवठा रखडल्यामुळे मार्चमध्ये होणार असलेला तेजस एमके-१ए लढाऊ विमानांचा पुरवठा आता जून अखेरपर्यंत सुरू होणार आहे.