बॉलिवूडमधील ज्येष्ठ अभिनेत्री नीना गुप्ता यांनी नुकताच आपला ६६ वा वाढदिवस मोठ्या धुमधडाक्यात साजरा केला. 'मेट्रो इन दिनों' या चित्रपटाच्या टीमसोबत झालेल्या सेलिब्रेशनमध्ये नीना यांचा लूक चर्चेचा विषय ठरला आहे. त्यांनी सफेद रंगाचा स्टायलिश 'काफ्तान ड्रेस' आणि ट्रेंडी ‘बिस्किट ब्रा’ असा बोल्ड पेहराव केला होता.
नीना यांचा हा आत्मविश्वासपूर्ण अंदाज काही जणांना आवडला, तर काहीजणांनी त्यांच्या वयाचा दाखला देत सोशल मीडियावर त्यांना ट्रोल केलं. काही युजर्सनी त्यांच्या ड्रेसिंग सेन्सचं कौतुक केलं, "ती स्वतःच्या अटींवर आयुष्य जगते, तिला जे आवडतं ते घालते", अशी प्रतिक्रिया देत समर्थन केलं. तर काहींनी “थोडी तरी शरम बाळगा मॅडम” अशा टीका करत तिला वयानुसार कपडे घालण्याचा सल्ला दिला.
या पार्टीत आदित्य रॉय कपूर, सारा अली खान, पंकज त्रिपाठी, कोंकणा सेन शर्मा आणि दिग्दर्शक अनुराग बसू हेही उपस्थित होते. पण सर्वांची नजर नीना यांच्यावरच खिळून राहिली. विशेष म्हणजे, तिचा ड्रेस तिच्या मुलगी मसाबा गुप्ताच्या फॅशन लेबलचा होता.
नीना गुप्ता यांचा वैयक्तिक जीवन प्रवासही तितकाच चर्चेत राहिलेला आहे. प्रसिद्ध क्रिकेटर विवियन रिचर्ड्ससोबतच्या नात्यामुळे त्या प्रकाशझोतात आल्या होत्या. त्यांच्या या नात्यातून मसाबा गुप्ता हिचा जन्म झाला. मसाबा आता एक यशस्वी फॅशन डिझायनर आहे. नंतर २००८ मध्ये नीनाने विवेक मेहरा या चार्टर्ड अकाउंटंटशी लग्न केलं.
एकूणच, नीना गुप्ताचा यांचा हा बोल्ड लूक, तिचा आत्मविश्वास, आणि वयाला धक्का देणारी स्टाईल पुन्हा एकदा चर्चेचा विषय ठरली आहे. जिथे काहींनी ती अभिनेत्री म्हणून गौरवली, तर काहींनी समाजाच्या 'मापदंडांवर' तिला झोडपलं.