जिल्ह्यामध्ये पिंपळगाव खांड व आंबित धरण भरल्यानंतर वाकी हे धरण तिसरे भरलेले धरण ठरले आहे .अकोले तालुक्यातील भंडारदरा म्हणजे पावसाचे माहेरघर समजले जाते . गत तीन ते चार दिवसापासून भंडारदरा धरणाच्या पाणलोटात जोरदार पाऊस सुरू आहे. बुधवारी रात्री प्रचंड प्रमाणात मुसळधार पाऊस झाल्यामुळे रतनवाडी येथे ७ इंच तर घाटघर येथे ६ इंच पावसाची नोंद झाली . सततच्या पडत असलेल्या पावसामुळे डोंगरावरून धबधब्यांच्या मालिका सुरू झाल्याने ओढे नाले खळखळून वाहत असल्याकारणाने तसेच रतनवाडी येथील प्रवरा नदी दुथडी वाहत असल्याने भंडारदरा धरणामध्ये जवळजवळ २४ तासांमध्ये अर्धा टी एम सी नवीन पाण्याची आवक झाली . त्यामुळे भंडारदरा धरणाचा पाणीसाठा हा ३२३४ दलघफु झाला असून भंडारदरा धरण २९ टक्के भरले आहे.धरणामध्ये २४ तासामध्ये ४३५ दलघफु नवीन पाण्याची आवक झाली आहे.गत २४ तासांमध्ये पावसाचे माहेरघर समजल्या जाणाऱ्या घाटघरला १५७ मी मी पावसाची नोंद झाली असून आत्तापर्यंत सर्वात जास्त पाऊस हा बुधवारी रतनवाडी येथे नोंदला गेला असून १६९ मी मी पाऊस तेथे पडला.भंडारदरा येथे १२२ मी मी तर पांजरे १२५ मी मी व वाकी येथे ८९ मी मी पाऊस पडला.सदर पावसाच्या आकडेवारीवर भंडारदरा धरण शाखेचे शाखाधिकारी प्रवीण भांगरे यांच्या अधिपत्याखाली वसंत भालेराव, हौशीराम मधे, चंदर उघडे, बाळासाहेब भांगरे, चंद्रकांत भगत, सुरेश हंबीर व इतर कर्मचारी हे लक्ष ठेवून आहेत.