विमानात किंवा हॉस्टेलमध्ये नसूनही चित्रपट निर्मात्याचा विमान अपघातात मृत्यू

अहमदाबाद : एअर इंडियाच्या AI 171 विमान अपघाताशी संबंधित एक नवी बातमी आली आहे. विमानात किंवा हॉस्टेलमध्ये नसूनही चित्रपट निर्माते महेश जिरावाला यांचा विमान अपघातामुळेच मृत्यू झाला. डीएनए चाचणीअंती अहमदाबाद पोलिसांनी ही माहिती दिली. ज्या दिवशी विमान अपघात झाला त्या दिवसापासूनच ३४ वर्षीय चित्रपट निर्माते महेश जिरावाला बेपत्ता होते. पोलीस जिरावाला यांना शोधत होते. चित्रपट निर्माते महेश जिरावाला दुचाकीवरुन घरी जाण्यासाठी निघाले होते, असे पोलिसांना कळले. यामुळे जिरावाला कोणत्या मार्गाने घरी जात होते याचा तपास करण्यात आला. या मार्गात विमान अपघाताचे ठिकाण असल्याचे लक्षात आले. चित्रपट निर्माते महेश जिरावाला यांना शेवटचे बघणाऱ्यांनी दिलेली माहिती तसेच जिरावालांचा घरी जाण्याचा मार्ग यामुळे विमान अपघातात जिरावाला यांचा मृत्यू झाल्याची शंका पोलिसांच्या मनात आली. अखेर शंका निरसनासाठी डीएन चाचणी करण्याचा निर्णय झाला. जिरावाला कुटुंबातील सदस्यांचे डीएनए आणि मृतांपैकी एका व्यक्तीचा डीएनए जुळला. डीएनए जुळले आणि महेश जिरावाला यांच्या मृतदेहाची ओळख पटली. पोलिसांनी घटनास्थळाजवळचे सीसीटीव्ही फूटेज तपासले. या फूटेजमध्ये विमान अपघात झाला त्या वेळी जिरावाल त्याच भागातून दुचाकीवरुन जाताना दिसले. अखेर दुचाकीवरुन जाताना जिरावाला हॉस्टेलच्या इमारतीजवळ होते जेव्हा अपघात झाला, असा निष्कर्ष काढण्यात आला. आगीत जळून खाक झालेली जिरावालांची दुचाकी पोलिसांनी शोधली. यानंतर नातलगांनी चित्रपट निर्माते महेश जिरावाला यांचा मृतदेह स्वीकारला.