पुणे: पुण्यात एका १८ वर्षीय तरुणाने आत्महत्या केली आहे. आत्महत्या करण्यापूर्वी त्या तरुणाने एक ऑडिओ आणि व्हिडिओदेखील रेकॉर्डिंग केले होते. ज्यामध्ये त्याने म्हंटले होते की "मम्मी, मी माझा मोबाईल फोडून टाकेन. कोणताही पुरावा मिळणार नाही. मला मरायचे आहे. मी विष प्राशन केले आहे. मी तुला लोकेशन पाठवले आहे. तिथून माझा मृतदेह घेऊन जा."
सदर घटना पुण्यातील देहू रोड पोलिस स्टेशनच्या हद्दीत घडली आहे. आत्महत्या करणाऱ्या तरुणाचे नाव संजय कुमार विनोदकुमार राजपूत असे आहे. त्याच्या आत्महत्येचे कारण अद्याप समजू शकले नसले तरी, त्याने नैराश्यामुळे आत्महत्या केल्याचा प्राथमिक अंदाज देहूरोड पोलिसांनी वर्तवला आहे.
ही घटना काही दिवसांपूर्वीची असून, दिनांक १७ जून रोजी देहूरोड पोलिस ठाण्यात संजय कुमार बेपत्ता असल्याची तक्रार दाखल त्याच्या कुटुंबीयांकडून करण्यात आली होती. अखेर शनिवारी त्याचा मृतदेह घोरवडेश्वर टेकडीच्या पायथ्याशी आढळला. मृतदेहाजवळ विषारी औषधाची बाटली आढळली. पोलीस तपासात संजय कुमारने विष प्राशन करून आत्महत्या केल्याचे समोर आले आहे. पोस्टमॉर्टम रिपोर्टमध्येही तेच म्हटले आहे.
आत्महत्येपूर्वी बनवला व्हिडिओ
संजय कुमार पिंपरी-चिंचवड परिसरात त्याच्या कुटुंबासह राहत होता. त्याच्या कुटुंबात त्याचे पालक आणि दोन बहिणी आहेत. संजय कुमारने आत्महत्येपूर्वी ऑडिओ रेकॉर्ड केला होता. ऊं ऑडिओमध्ये त्याने त्याच्या बहिणींबद्दल चिंता व्यक्त केली आणि पालकांना त्यांना उच्च शिक्षण देण्याची विनंती केली. तसेच आत्महत्येचा एक व्हिडिओ देखील त्याने बनवला, ज्यात त्याने विष प्राशन केल्याचे सांगितले. यामध्ये तो प्रचंड नैराश्यात दिसत होता. आत्महत्या करण्यासाठी त्याने ऑनलाइन विषारी औषध मागवले होते. त्यानंतरच त्याने हे पाऊल उचलले. सध्या पोलीस आत्महत्येपूर्वी रेकॉर्ड केलेल्या ऑडिओ आणि व्हिडिओची चौकशी करत आहेत.