College students clashes: पुण्यात भरदिवसा कॉलेजच्या विद्यार्थ्यांमध्ये राडा, कॅम्पसमध्ये कोयते आणि हातोड्याने हल्ले

पुणे: शैक्षणिक राजधानी समजल्या जाणाऱ्या पुण्यातच विद्यार्थ्यांमध्ये राडा झाल्याचे समोर आले आहे. एका नामांकित संस्थेच्या कॅम्पसमध्येच विद्यार्थ्यांमध्ये कोयत्यांनी आणि हातोड्यांनी मारहाण झाल्याची धक्कादायक घटना उघडकीस आली आहे. पुण्यात आझम कॅम्पसमध्ये हाणामारी झाल्याची घटना समोर आली आहे. कॉलेजच्या विद्यार्थ्यांमध्ये हा राडा झाला. या घटनेनमुळे परिसरात भीतीचे वातावरण पसरले आहे.

दोन विद्यार्थी गंभीर जखमी

मिळालेल्या माहितीनुसार, आझम कॅम्पस परिसरातील कॉलेजमध्ये दोन गटांमध्ये तुंबळ राडा झाला. हातात कोयते आणि हातोडे घेऊन काही तरुणांनी कॉलेजच्या आवारातच प्रवेश करून दोन विद्यार्थ्यांवर हल्ला चढवला. यामध्ये दोघे गंभीर जखमी झाले आहेत. त्यांना उपचारासाठी रुग्णालयात दाखल करण्यात आले आहे. ही घटना कॉलेजच्या वेळेतच घडल्यामुळे उपस्थित विद्यार्थी शिक्षक व कर्मचाऱ्यांमध्ये एकच खळबळ उडाली.

पोलिस तपास सुरू

हल्लेखोर विद्यार्थी की बाहेरचे होते, याबाबत पोलीस तपास सुरू आहे. हल्ल्यासाठी वापरलेले कोयते आणि हातोडे कॅम्पस मध्ये कसे आले? हाच मोठा प्रश्न सध्या निर्माण झाला आहे. घटनेनंतर पुणे पोलिसांनी तातडीने घटनास्थळी धाव घेतली. CCTV फुटेज तपासले जात आहेत. या प्रकरणी गुन्हा दाखल करण्यात आला आहे. मारहाणीमागे वैयक्तिक वाद की गँग संबंधित कारण आहे हे शोधले जात आहे.