मुंबई : मराठी चित्रपटसृष्टीतील प्रसिद्ध अभिनेते आणि दिग्दर्शक महेश कोठारे यांच्यावर एक काळ असा होता, जेव्हा त्यांना मोठ्या आर्थिक अडचणींचा सामना करावा लागला होता. त्यांचा मुलगा, अभिनेता आदिनाथ कोठारेने दिलेल्या एका मुलाखतीमध्ये या कठीण काळातील आठवणींना उजाळा दिला आहे.
आदिनाथने सांगितले की, 'खबरदार' चित्रपटाच्या चित्रीकरणादरम्यान त्यांचं कुटुंब मोठ्या आर्थिक संकटातून जात होतं. महेश कोठारे यांनी काही हिंदी चित्रपट केले होते, जे बॉक्स ऑफिसवर अपयशी ठरले आणि त्यामुळे त्यांना मोठा तोटा झाला. या परिस्थितीमुळे २००५ मध्ये, 'खबरदार' चित्रपटाचं चित्रीकरण कोल्हापूरमध्ये सुरू असताना, मुंबईतील त्यांचं घर बँकेने जप्त केलं होतं.
आदिनाथने पुढे सांगितलं, "मुंबईत त्यावेळी आमचं घर नव्हतं. पण या सगळ्या तणावाला बाजूला ठेवून वडिलांनी कामावर लक्ष केंद्रित केलं आणि 'खबरदार' हा चित्रपट बनवला, जो नंतर हिट ठरला." 'खबरदार' हा असा चित्रपट होता जिथे आदिनाथने पहिल्यांदाच आपल्या वडिलांना असिस्ट केलं होतं आणि त्यावेळी तो वयात येत होता.
चित्रपटाचं शूटिंग संपल्यानंतर आदिनाथ, त्याचे आजी-आजोबा पुण्यात थांबले, तर त्याचे आई-वडील मुंबईत घर शोधायला आले. सुरुवातीला त्यांनी भाड्याने घर घेतलं आणि नंतर कांदिवलीमध्ये स्थायिक झाले. आदिनाथने नमूद केलं की, "जिथे सिनेमाच्या या 'जुगारात' माझ्या कुटुंबाने सगळं गमावलं, तिथेच पुन्हा त्यांनी ते मिळवलं." यानंतर त्यांचं प्रॉडक्शन हाऊस सुरू झालं.
या सर्व चढ-उतारांमध्येही घरातील वातावरणावर कधीही परिणाम झाला नाही, असं आदिनाथने आवर्जून सांगितलं. हे कोठारे कुटुंबाच्या एकजुटीचं आणि संकटांशी खंबीरपणे सामना करण्याच्या वृत्तीचं द्योतक आहे.