कर्नाटकच्या काँग्रेस सरकारवर चित्रा वाघ यांचा हल्लाबोल
मुंबई : कर्नाटक राज्यातून छत्रपती शिवाजी महाराजांच्या अपमानाची एक धक्कादायक बातमी समोर आली आहे. बंगळूरमधील ‘शिवाजीनगर मेट्रो स्टेशन’चे नाव बदलून ‘सेंट मेरी’ करण्याची मागणी काँग्रेस आमदार रिझवान यांनी केली आहे. विशेष म्हणजे, या मागणीला मुख्यमंत्री सिद्धरामय्या यांनी पाठिंबा देत, नामांतराचा प्रस्ताव केंद्र सरकारकडे पाठवला असल्याचंही समोर आलं आहे. या घटनेमुळे भाजपच्या महिला प्रदेशाध्यक्ष चित्रा किशोर वाघ यांनी काँग्रेसवर जोरदार हल्ला चढवला आहे.
चित्रा वाघ यांचा काँग्रेसवर थेट हल्ला
भाजपच्या महिला प्रदेशाध्यक्ष चित्रा वाघ यांनी या प्रकरणी काँग्रेसवर तीव्र शब्दांत टीका केली आहे. "पुन्हा एकदा काँग्रेसचा छत्रपती शिवाजी महाराजांविषयीचा द्वेष उफाळून आला आहे," अशा शब्दांत त्यांनी आपला संताप व्यक्त केला. कर्नाटक काँग्रेसने केलेल्या या कृतीवर महाराष्ट्र काँग्रेसने आपली भूमिका स्पष्ट करावी, असे थेट आव्हान त्यांनी दिले आहे.
"महाराष्ट्रातील काँग्रेस आता तरी आपली भूमिका स्पष्ट करणार की गप्प बसणार?" असा जळजळीत सवाल त्यांनी विचारला आहे. महाराष्ट्रात महाविकास आघाडीमध्ये काँग्रेससोबत असलेले त्यांचे मित्रपक्ष, विशेषतः त्यांच्यावर टीका करणारे, आता या अपमानावर गप्प का आहेत, असा प्रश्नही त्यांनी उपस्थित केला. "उबाठा गटाला डिवचत त्यांनी म्हटले की, इथले त्यांचे मित्रपक्ष आहेत... त्यांचा स्वयंघोषित विश्वगुरू रडत रौत अजून गप्प कसे?" असा उपरोधिक टोलाही त्यांनी लगावला.
राजकीय वादळ आणि महाराष्ट्रातील शांतता
कर्नाटक सरकारमधील या घडामोडीमुळे महाराष्ट्राच्या राजकारणात मोठे वादळ निर्माण होण्याची शक्यता आहे. छत्रपती शिवाजी महाराजांच्या नावाने राजकारण करणाऱ्या पक्षांनी या अपमानावर गप्प राहणे, ही गंभीर बाब आहे. भाजपचा आरोप आहे की, कर्नाटक काँग्रेसने केलेला हा अपमान महाराष्ट्रातील काँग्रेस आणि त्यांच्या मित्रपक्षांना मान्य आहे का, हे त्यांनी स्पष्ट करावं.
सध्या तरी, काँग्रेस आणि त्यांच्या मित्रपक्षांकडून यावर कोणतीही अधिकृत प्रतिक्रिया आलेली नाही. मात्र, हा मुद्दा आगामी काळात महाराष्ट्राच्या राजकारणात मोठा रंगतदार संघर्ष निर्माण करणार, यात शंका नाही.