८० कोटींचे गैरव्यवहार प्रकरण भोवले
मुंबई : महापालिकेचे सहाय्यक आयुक्त महेश पाटील यांच्या नावाने ८० कोटी रुपयांच्या रुपयांच्या गैरव्यवहार प्रकरणी आरोप होऊ लागल्याने अखेर महापालिका आयुक्त तथा प्रशासक डॉ. भूषण गगराणी यांनी त्यांना एक महिन्याच्या सक्तीच्या रजेवर पाठवण्याचा निर्णय घेतला आहे. याबाबतचे आदेश जारी झाले आहे. दरम्यान, महेश पाटील यांनी याप्रकरणी पोलिसांच्या चौकशीतून सत्य बाहेर येईल आणि यासाठी पोलिसांना सर्वप्रकारचे सहकार्य केले जाईल असे त्यांनी स्पष्ट केले.
वांद्रे येथील पुनर्विकास प्रकल्पात गुंतवणूक केल्यास स्वस्त दरात घरे मिळतील असे आमिष दाखवून तब्बल ८० कोटी रुपयांची रक्कम हडपल्याची बाब समोर आली आहे. यामध्ये महापालिकेच्या सहाय्यक आयुक्त पाटील यांच्यासह थेट उच्चपदस्थ पोलीस तसेच पालिका अधिकारी आणि बॉलीवूड अभिनेत्यांनीही पैसे गुंतवले होत असे बोलले जात आहे. याप्रकरणात आपल्याला महापालिका सहायक आयुक्तांसह इतरांनी मारहाण केल्याचा आरोप तक्रारदाराने केला. याबाबतचे व्हिडीओ सोशल मिडियावर व्हायरल होत आहेत. या प्रकरणी महापालिका सहायक आयुुक्त महेश पाटील यांच्या नावाने आरोप झाल्याने महापालिका आयुक्त डॉ. भूषण गगराणी यांनी त्यांना एक महिन्याच्या सक्तीच्या रजेवर पाठवण्याचे आदेश जारी केले आहे. त्यानुसार त्यांना एक महिन्याच्या सक्तीच्या रजेवर पाठवण्यात आले आहे.