नियमभंग करणाऱ्या वाहनचालकांसाठी मोठी मोहीम राबवणार
ठाणे : ठाणे शहरातील वाढती वाहतूक कोंडी, नियमभंग आणि बेशिस्त वाहनचालकांमुळे नागरिकांचे हाल होत असतानाच, नामदार प्रताप सरनाईक यांच्या सूचनेवरून, ठाणे प्रादेशिक परिवहन कार्यालयाने (आरटीओ) कडक पावले उचलत घोडबंदर रोडसह महत्त्वाच्या मार्गांवर बेशिस्त वाहनचालकांवर धडक कारवाई सुरू करण्याचे आदेश जारी केले आहेत. येत्या काही दिवसांत नियमभंग करणाऱ्या वाहनचालकांसाठी मोठी मोहीमही राबवली जाणार आहे.
प्रादेशिक परिवहन अधिकारी हेमांगिनी पाटील यांच्या आदेशानुसार वायुदत पथक क्रमांक १ ते ५, तसेच १० मोटार वाहन निरीक्षकांना तातडीने कारवाईचे निर्देश देण्यात आले आहेत. शीतपेय गाड्या, ट्रॅव्हल्स, खासगी बस, वजनदार वाहने तसेच नियमबाह्य पार्किंग, परवाना नोंदणीतील त्रुटी, ध्वनी-प्रदूषण वाढवणारे फेरफार अशा नियमभंगांवर लक्ष केंद्रित केले जाणार असल्याची माहिती उप प्रादेशिक परिवहन अधिकारी रोहित काटकर
यांनी दिली.
अनेक वाहनचालकांकडून हेल्मेट न वापरणे, लेनची शिस्त न पाळणे, दुचाकींवर तिघे जण बसवणे, अवैधपणे मालवाहतूक करणे असे प्रकार नियमितपणे दिसत आहेत. यावर नियंत्रण आणण्यासाठी ‘विशेष तपासणी मोहीम’ सुरू करण्याचे आदेश देण्यात आले असून, दररोज कडक दंडात्मक कारवाई, वाहन जप्ती, परवाना रद्द करणे अशा कठोर दंडांची तरतूद केली जाणार आहे.