बागेश्वर धाम : बागेश्वर धामचे पीठाधीश्वर पंडित धीरेंद्र कृष्ण शास्त्री यांनी उच्च शिक्षणाची इच्छा व्यक्त करत पीएचडी करण्याचा मानस जाहीर केला आहे. कोणत्या विषयावर संशोधन करणार, याबद्दल सध्या उत्सुकता वाढली असून या चर्चेला मोठी रंगत आली आहे.
काही दिवसांपूर्वी माध्यमांशी संवाद साधताना धीरेंद्र शास्त्री यांनी सांगितले की ते नियमितपणे अभ्यास करत आहेत आणि पीएचडीसाठी तयारीही सुरू आहे. यावेळी पीएचडीच्या विषयाबाबत विचारले असता त्यांनी विनोदात, भूताखेतांवर आधारित विषयाचा गंभीर अभ्यास करण्याचा विचार करत असल्याचे सांगितले.
जगभरातील अनेक विद्यापीठांमध्ये भुतांवर संशोधन केले जाते आणि काही संशोधकांनी या विषयावर पीएचडीही केली आहे. ऑक्सफर्डसारख्या नामांकित विद्यापीठातही अलौकिक घटनांवर अभ्यासक्रम उपलब्ध आहेत. भविष्यात या विषयावर बाहेरील विद्यापीठात अर्ज करण्याची इच्छा असल्याचे बागेश्वर धामचे पीठाधीश्वर पंडित धीरेंद्र कृष्ण शास्त्री म्हणाले.
सध्या त्यांनी कोणत्याही महाविद्यालयात प्रवेश घेतलेला नसला तरी भुतांवर आधारित संशोधनाचा त्यांचा इरादा स्पष्ट दिसतो. अलौकिक विषयांवरील अभ्यास नवा नाही. एडिनबर्ग विद्यापीठ गेल्या पाच दशकांपासून भूतविद्येसंबंधी अभ्यासक्रम राबवत आहे. भारतातही काही शिक्षणसंस्था असे कोर्स चालवतात. थॉमस फ्रान्सिस विद्यापीठ आणि बनारस हिंदू विद्यापीठात आयुर्वेद शाखेत ‘भूत विद्ये’वर प्रमाणपत्र अभ्यासक्रम उपलब्ध आहे. धीरेंद्र कृष्ण शास्त्रींच्या या नव्या निर्णयामुळे भूतविद्या आणि अलौकिक संशोधनाविषयी नव्याने चर्चा सुरू झाली आहे.