ढाका: मागील काही दिवसांपासून बांगलादेशमध्ये मोठा गोंधळ सुरू आहे. काही दिवसांपूर्वी दोन हिंदू तरुणांची जमावाने हत्या केल्याचे समोर आले होते. हिंदूवरील हल्ले थांबत नाहीत. आता पुन्हा एकदाएका हिंदू व्यक्तीवर हल्ला झाल्याचे समोर आले. शरीयतपूर परिसरात खोकन चंद्रा नावाच्या एका हिंदू व्यक्तीला जमावाने घेरले. त्याला आधी क्रूरपणे मारहाण करण्यात आली, नंतर चाकूने मारले आणि नंतर पेट्रोल टाकून जिवंत जाळण्याचा प्रयत्न करण्यात आला. मात्र खोकन चंद्रा यांनी तात्काळ जवळच्या तलावात उडी मारल्याने त्यांचा जीव वाचला आहे.
मिळालेल्या माहितीनुसार, ३१ डिसेंबरच्या रात्री ९ वाजता कानेश्वर युनियनमधील तिलोई परिसरात हा क्रूर हल्ला झाला. खोकन चंद्रा हे व्यापारी आहेत. दामुड्यातील केउरभंगा बाजारात त्यांची फार्मसी आहे. रात्रीच्या वेळी खोकन चंद्रा दुकान बंद करून घरी निघाले तेव्हा तिलोई परिसरात त्यांना काही गुन्हेगारांनी अडवले. या हल्लेखोरांनी त्यांच्यावर धारदार शस्त्रांनी हल्ला केला आणि नंतर त्यांच्या अंगावर पेट्रोल ओतून त्यांना पेटवून दिले. आगीतून जीव वाचवण्यासाठी खोकन चंद्रा यांनी जवळच्या तलावात उडी मारली. हा सर्व प्रकार पाहणाऱ्या लोकांनी गंभीर अवस्थेतील खोकन यांना तात्काळ शरीयतपूर येथील रुग्णालयात दाखल केले.
या घटनेमुळे परिसरात प्रचंड दहशत पसरली आहे. या हल्ल्यामागील हेतू आणि त्यात सहभागी असलेल्यांची ओळख अद्याप पटलेली नाही. दरम्यान, युनूस यांच्या नेतृत्वाखालील अंतरिम सरकारच्या काळात बांगलादेशमध्ये हिंदूंसह अल्पसंख्याकांविरुद्ध हिंसाचार वाढला आहे, ज्यामुळे लोकांमध्ये आणि जगभरातील अनेक मानवाधिकार संघटनांमध्ये संतापाची लाट उसळली आहे.
१८ डिसेंबर रोजी, मयमनसिंगच्या भालुका उपजिल्हा येथील त्याच्या कारखान्यात एका मुस्लिम सहकाऱ्याने खोट्या ईशनिंदेच्या आरोपावरून २५ वर्षीय हिंदू तरुण दिपू चंद्र दास याला जमावाने मारहाण करून निर्घृणपणे ठार मारले. जमावाने दास यांची हत्या केली आणि नंतर त्याचा मृतदेह झाडाला लटकवला आणि नंतर तो जाळून टाकला. यानंतर २४ डिसेंबर रोजी, बांगलादेशातील कालीमोहर युनियनमधील हुसेनडांगा भागात २९ वर्षीय अमृत मोंडल नावाच्या आणखी एका हिंदू तरुणाची जमावाने मारहाण करून हत्या केल्याचा आरोप आहे.