KJVMM Box Office: वर्षाच्या पहिल्याच दिवशी मराठी शाळेतल्या पोरांनी बॉक्स ऑफिस गाजवलं
मुंबई: महाराष्ट्रात आज 'मराठी भाषा' अभिजात झाली, याचा अभिमान महाराष्ट्रात मिरवला जातो; पण त्याच वेळी राज्यातील मराठी माध्यमाच्या शाळा एकामागोमाग एक बंद पडत चालल्या आहेत.या विसंगतीवर बोट ठेवणारा, थेट प्रश्न विचारणारा आणि अंतर्मुख करणारा सिनेमा म्हणजे 'क्रांतिज्योती विद्यालय मराठी माध्यम', लेखक-दिग्दर्शक हेमंत ढोमे यानं हा सिनेमा केवळ कथा म्हणून नाही, तर सामाजिक वास्तव दाखवणारा आरसा म्हणून उभा केला आहे. गेल्या काही दिवसांपासून हेमंत ढोमे आणि क्षिती जोग यांच्या ' क्रांतीज्योती विद्यालय मराठी माध्यम ' या सिनेमाची चर्चा सुरू होती. मल्टीस्टाटर सिमेमाच्या टीझरला आणि ट्रेलरला प्रेक्षकांनी पसंती दिली होती. आता नवीन वर्षाच्या मुहूर्तावर प्रदर्शित झालेल्या 'क्रांतीज्योती विद्यालय मराठी माध्यम' या चित्रपटानं पहिल्याच दिवशी प्रेक्षकांची मने जिंकली असून बॉक्स ऑफिसवरही जोरदार कमाई केली आहे. मराठी शाळांच्या मुद्द्यांवर भाष्य करणाऱ्या या संवेदनशील विषयाला प्रेक्षकांनी भरभरून प्रतिसाद दिला आहे.
नवीन वर्षाच्या मुहूर्तावर प्रदर्शित झालेल्या क्रांतीज्योती विद्यालय मराठी माध्यम या चित्रपटने प्रेक्षकांची मने जिंकली आहेत. या चित्रपटाने बॉक्स ऑफिस वरही जोरदार कमाई केली आहे. महत्वाचे म्हणजे या चित्रपटाची कथा ही मराठी शाळेवर आहे . त्यामुळे प्रेक्षकांनीही भरभरून प्रतिसाद दिला आहे. क्रांतीज्योती विद्यालय मराठी माध्यम चित्रपटाबद्दल बोलायचं झालं तर हेमंत ढोमे याने अत्यंत गंभीर विषयाला कौटुंबिक मनोरंजनाची जोड दिली आहे. सिनेमात सचिन खेडेकर, अमेय वाघ, सिद्धार्थ चांदेकर यांच्या मुख्य भूमिका आहेत. तर युट्यूबर आणि बॉलिवूड अभिनेत्री प्राजक्ता कोळी हिनं या सिनेमातून मराठी इंडस्ट्रीत पदार्पण केलंय.
पहिल्या दिवसाची कमाई
या चित्रपटानं पहिल्या दिवशी संपूर्ण महाराष्ट्रात सुमारे ७८.४३ लाखांचा जोरदार गल्ला जमवला आहे. वर्षाच्या सुरुवातीला सुट्टीचा दिवस असल्यानं मुंबई, पुणे आणि कोल्हापूर सारख्या शहरांमधील मल्टिप्लेक्समध्ये अनेक शो 'हाऊसफुल' पाहायला मिळाले. आश्चर्याची बाब म्हणजे बॉलिवूडचा धुरंधर सिनेमा अजूनही बॉक्स ऑफिस ऑफिसवर आहे. त्यातच इक्कीस हा सिनेमाही प्रदर्शित झालाय. त्यामुळं या दोन मोठ्या सिनेमांना टक्कर देत 'क्रांतीज्योती विद्यालय मराठी माध्यम' या सिनेमानं पहिल्याच दिवशी समाधानकारक कमाई केली आहे.
काय आहे सिनेमाची कथा?
रायगड जिल्ह्यातील एका ९० वर्षे जुन्या मराठी शाळेला वाचवण्यासाठी एकत्र आलेल्या माजी विद्यार्थ्यांचा हा भावनिक प्रवास प्रेक्षकांना सिनेमात पाहायला मिळाली.कथानक हे अलिबाग नागांव येथील मराठी माध्यमाच्या शाळेभोवती फिरतं. ९० वर्षे जुनी असलेली ही शाळा आता पाडली जाणार आहे. त्या ठिकाणी 'इंटरनॅशनल स्कूल' उभी केली जाणार आहे. मात्र ही केवळ एका शाळेची गोष्ट नाही, तर महाराष्ट्रातील असंख्य मराठी शाळांची व्यथा सांगणारा हा चित्रपट आहे.