ट्रम्प यांच्या 'धमकी'विरोधात जर्मनी, फ्रान्ससह ७ देश एकवटले
वॉशिंग्टन (वृत्तसंस्था) : अमेरिकेचे राष्ट्राध्यक्ष डोनाल्ड ट्रम्प यांनी ग्रीनलँडवर दावा सांगत दिलेल्या धमकीमुळे आंतरराष्ट्रीय राजकारणात खळबळ माजली आहे. ट्रम्प यांच्या या विस्तारवादी भूमिकेला आता युरोपीय राष्ट्रांनी कडाडून विरोध दर्शवला असून, फ्रान्स व जर्मनीसह सात प्रमुख देशांनी एकत्र येत अमेरिकेला इशारा दिला आहे. ग्रीनलँडची सुरक्षा ही युरोपची प्राथमिकता असून, त्याच्या भविष्याचा निर्णय घेण्याचा अधिकार केवळ डेन्मार्क व तिथल्या जनतेलाच आहे, असे या देशांनी संयुक्त निवेदनात स्पष्ट केले आहे.
व्हेनेझुएलाचे राष्ट्राध्यक्ष निकोलस मादुरो यांच्या अटकेनंतर पत्रकारांशी बोलताना डोनाल्ड ट्रम्प यांनी त्यांचे पुढचे लक्ष्य ‘ग्रीनलँड’ असल्याचे संकेत दिले होते. डोनाल्ड ट्रम्प म्हणाले, ‘आम्हाला ग्रीनलँड हवे आहे. कारण तिथे रशियन व चिनी जहाजांचा वावर वाढला आहे. युरोपीय महासंघाचीही इच्छा आहे की, अमेरिकेने ग्रीनलँडचा ताबा घ्यावा.’ ट्रम्प यांनी हे पाऊल अमेरिकेची सुरक्षा व आर्थिक हितासाठी आवश्यक असल्याचे सांगितले. त्यांच्या या विधानामुळे युरोपमध्ये चिंतेचे वातावरण पसरले आहे.
ग्रीनलँड विक्रीसाठी नाही! : युरोपीय देशांनी या निवेदनाद्वारे अमेरिकेला स्पष्ट संकेत दिले आहेत की, ग्रीनलँड ही कोणत्याही प्रकारची ‘मालमत्ता’ किंवा ‘सौद्याची वस्तू’ नाही. तो तिथल्या लोकांच्या हक्काचा प्रदेश आहे. ट्रम्प यांनी व्हेनेझुएलातील लष्करी हस्तक्षेपाचे समर्थन करताना त्याला ‘शांतता मोहीम’ म्हटले होते, मात्र ग्रीनलँडच्या बाबतीत युरोपने घेतलेली ही आक्रमक भूमिका ट्रम्प प्रशासनासाठी मोठी अडचण ठरू शकते.