मुंबई : बॉलीवूडचे 'ॲक्शन किंग' म्हणून ओळखले जाणारे दिग्दर्शक रोहित शेट्टी यांच्या जुहू येथील बंगल्याबाहेर शनिवारी रात्री उशिरा अज्ञात हल्लेखोरांनी गोळीबार केला. या अनपेक्षित घटनेमुळे परिसरात भीतीचे वातावरण पसरले असून चित्रपटसृष्टीत मोठी खळबळ उडाली आहे. मिळालेल्या माहितीनुसार, हल्लेखोर दुचाकीवरून आले होते आणि त्यांनी बंगल्याच्या दिशेने गोळ्या झाडल्या. सुदैवाने, या भ्याड हल्ल्यात रोहित शेट्टी किंवा त्यांच्या कुटुंबातील कोणताही सदस्य जखमी झालेला नाही. घटनेची माहिती मिळताच पोलिसांनी घटनास्थळी धाव घेतली असून परिसरातील सीसीटीव्ही (CCTV) फुटेज तपासण्याचे काम युद्धपातळीवर सुरू आहे. हा हल्ला नेमका कोणी आणि कोणत्या कारणाने केला, याचा तपास सध्या पोलीस करत आहेत.
नेमकं काय घडलं?
दुचाकीवरून आला अन्...
शनिवारी रात्री उशिरा एका अज्ञात तरुणाने हा गोळीबार केला असून, यामध्ये रोहित शेट्टी यांच्या बंगल्याच्या खिडक्यांचे नुकसान झाले आहे. रात्रीच्या अंधाराचा फायदा घेत एक तरुण दुचाकीवरून रोहित शेट्टीच्या बंगल्याबाहेर आला. आपली ओळख लपवण्यासाठी त्याने 'हुडी' घातली होती. बंगल्याजवळ थांबताच त्याने अचानक बंदूक काढून थेट घराच्या दिशेने ४ गोळ्या झाडल्या. या गोळीबारात खिडकीच्या काचा फुटून मोठ्या प्रमाणात नुकसान झाले आहे. कृत्य केल्यानंतर अवघ्या काही सेकंदातच तो तरुण दुचाकीवरून वेगाने पसार झाला. या घटनेमुळे परिसरात तणावाचे वातावरण असून पोलिसांनी अज्ञात हल्लेखोराविरुद्ध गुन्हा दाखल केला आहे.
गोळीबाराच्या तपासासाठी पोलिसांची 'स्पेशल टीम' तैनात
रोहित शेट्टी यांच्या बंगल्यावरील गोळीबारानंतर जुहू पोलिसांनी तपासाची चक्रे वेगाने फिरवण्यास सुरुवात केली आहे. या घटनेचे गांभीर्य लक्षात घेऊन पोलिसांनी तातडीने रोहित शेट्टींच्या निवासस्थानाला पोलीस छावणीचे स्वरूप दिले असून, बंगल्याच्या परिसरात कडेकोट बंदोबस्त तैनात करण्यात आला आहे.
पोलिसांनी हा संपूर्ण परिसर तात्पुरता सील केला आहे. हल्लेखोर ज्या मार्गावरून आला आणि ज्या मार्गाने पसार झाला, त्या मार्गावरील सर्व सीसीटीव्ही (CCTV) फुटेज पोलीस बारकाईने तपासत आहेत. 'हुडी' घातलेल्या त्या अज्ञात तरुणाचा शोध घेण्यासाठी प्रत्यक्षदर्शींची आणि स्थानिक नागरिकांची चौकशी केली जात आहे. या हल्ल्यामागे नेमका कोणाचा हात आहे, हे अद्याप स्पष्ट झाले नसले तरी, पोलीस सध्या 'गँगस्टर अँगल'ने अधिक तपास करत आहेत.
सोशल मीडियावर व्हिडिओ व्हायरल
गोळीबारानंतर रोहित शेट्टी यांच्या बंगल्याबाहेर असलेल्या पोलिसांच्या ताफ्याचा आणि तणावपूर्ण वातावरणाचा व्हिडिओ सोशल मीडियावर वेगाने व्हायरल होत आहे. या घटनेमुळे सेलिब्रिटींच्या सुरक्षेचा प्रश्न पुन्हा एकदा ऐरणीवर आला आहे. याप्रकरणी पोलीस तपास करीत आहेत.