जम्मू काश्मीर: जम्मू आणि काश्मीरच्या उधमपूर जिल्ह्यात भारतीय लष्कराकडून मोठी कारवाई करण्यात आली आहे. या कारवाईत 'जैश-ए-मोहम्मद'च्या टॉप कमांडरसह दोन पाकिस्तानी दहशदवाद्यांचा खात्मा करण्यात आला आहे.
अधिकाऱ्यांनी दिलेल्या माहितीनुसार, जम्मू आणि काश्मीरच्या उधमपूर जिल्ह्यातील एका गुहेत अडकलेल्या जैश-ए-मोहम्मद संघटनेच्या एका वरिष्ठ कमांडरसह दोन पाकिस्तानी दहशदवाद्यांचा बुधवारी (४ फेब्रुवारी) खात्मा करण्यात आला. दुपारी १२ वाजता सैन्याने गुहेत घुसखोरी केली तेव्हा अनेक मोठे स्फोट ऐकू आले.
अधिकाऱ्यांनी पुढे सांगितले की, मारल्या गेलेल्या दहशतवाद्यांपैकी एक रुबानी उर्फ अबू माविया होता, जो जैश-ए-मोहम्मद संघटनेचा एक टॉप कमांडर होता आणि गेल्या अनेक वर्षांपासून या भागात सक्रिय होता.
भारतीय सैन्याचे ऑपरेशन "किया" यशस्वी:
मंगळवारी संध्याकाळी ४ वाजता रामनगर-बसंतगड परिसरातील वरच्या भागात सैन्याकडून मोठ्या प्रमाणात शोध मोहीम राबवण्यात येत असताना, लष्कराने, पोलिस आणि सीआरपीएफच्या संयुक्त पथकांनी दहशतवाद्यांचा माग काढला. त्यानंतर जोरदार गोळीबार सुरू झाला. तब्बल २० तासांहून अधिक काळ चाललेल्या या ऑपरेशनला सैन्याने "किया" (operation "KIA") असे नाव दिले आणि ते संपल्याचे सांगितले.
एका दहशतवाद्याचा मृतदेह गुहेच्या तोंडाशी आढळला, तर दुसऱ्याचा मृतदेह गुहेच्या आत खोलवर आढळला.